បេសកកម្ម​លើកទី២ របស់​ធនាគារ​ពិភពលោក ដើម្បី​បន្ត​ពិនិត្យ​មើល​ការអនុវត្ត​គម្រោង​ចំនួន០២ ដែល​គាំទ្រ​ផែនការ​ដល់​​អនុវត្ត​គណនេយ្យភាព​សង្គម ដំណាក់​កាលទី២ (I-SAF Phase II)

រាជធានីភ្នំពេញ៖ ឯកឧត្តម​ ង៉ាន់ ចំរើន រដ្ឋលេខាធិការ ក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បាន​អញ្ជើញ​ដឹកនាំ​បើក​កម្មវិធី​បេសកកម្ម​លើក​ទី២ របស់​ធនាគារពិភពលោក (WB) ដើម្បី​​​​ពិនិត្យ​មើល​ការអនុវត្ត​​គម្រោង​​ចំនួន ០២ គឺ «គម្រោង​សមាហរណកម្ម​គណនេយ្យភាព​សង្គមទៅក្នុង​ប្រព័ន្ធ​រដ្ឋបាលថ្នាក់ជាតិ និង​ថ្នាក់​ក្រោម​ជាតិ» អនុវត្ត​​​ដោយ​​លេខាធិការដ្ឋាន គ.ជ.អ.ប. (NCDDS) និង​​ «គម្រោង​ការផ្សារភ្ជាប់​ប្រជាពលរដ្ឋ​ដើម្បី​ចូលរួម​ធ្វើ​ឲ្យ​ប្រសើរ​ឡើង​នូវ​សេវាសាធារណៈ​តាមរយៈ​ការងារ​គណនេយ្យ​ភាពសង្គម» អនុវត្ត​​ដោយ​អង្គការ​​ទស្សនៈ​ពិភពលោក​ (WVI)។ កិច្ចប្រជុំ​នេះ​​រៀបចំ​ឡើង​តាមរយៈ​ប្រព័ន្ធ​វីដេអូសន្និសីទ (Video Conference Webex) ដែល​មាន​រយៈពេល០៥ថ្ងៃ ដែលបានប្រព្រឹត្តចាប់ពីថ្ងៃ ០៣-០៧ ខែ​ឧសភា ឆ្នាំ២០២១។​

គោលបំណងសំខាន់ៗនៃបេសកកម្មរួមមាន៖ (១) ពិនិត្យ និងវាយតម្លៃ​វឌ្ឍនភាពនៃគម្រោងធៀបទៅនឹងគោលបំណងអភិវឌ្ឍន៍របស់គម្រោង និង​ការអនុវត្ត​គម្រោងទាំងមូល រួម​​ទាំង​​ការគ្រប់គ្រងហិរញ្ញវត្ថុ លទ្ធកម្ម ប្រព័ន្ធត្រួតពិនិត្យ និងវាយតម្លៃ និងការគ្រប់គ្រងហានិភ័យបរិស្ថាន និងសង្គម (២) រៀបចំ​ផែនការ​សកម្មភាព​ដើម្បី​សម្រប​តាម​ការអនុវត្ត​​ដែល​ចាំបាច់​នៅក្នុងបរិបទនៃការផ្ទុះចុងក្រោយនៃ កូវីដ-១៩ និង (៣) ចាប់ផ្តើមការរៀបចំហិរញ្ញប្បទានបន្ថែមសម្រាប់គម្រោង។

បេសកកម្ម​រយៈពេល០៥ថ្ងៃនេះ បានដឹកនាំដោយ លោក បេនយ៉ាមីន បឺរខាត (Benjamin Burckhart) អ្នក​ឯកទេសអភិវឌ្ឍន៍​សង្គមជាន់ខ្ពស់ និង​​ជាប្រធាន​ក្រុម​ការងារ​ដឹកនាំ​បេសកកម្ម រួមជាមួយ​​សមាជិក​ក្រុមការងារ​ធនាគារ​ពិភពលោក (World Bank) ជាច្រើនទៀត។ សមាជិកក្រុមការងារ​ទាំងអស់​បាន​ចូលរួម​ការប្រជុំ​តាម​ផ្នែក​នីមួយៗ ជាមួយ​អ្នក​ជំនាញ​ឯកទេស​របស់​ធនាគារ​ពិភពលោក ។

សូមបញ្ជាក់ថា គម្រោងទាំង០២នេះ បានសម្ពោធដាក់ឱ្យអនុវត្តជាផ្លូវការកាលពីពាក់​កណ្តាលខែកុម្ភៈ ឆ្នាំ២០២១​កន្លង​​ទៅ​ថ្មីៗ​នេះ ដែល​​​បានទទួល​​ការគាំទ្រ​​ថវិកា​​ពី​មូល​និធិបរធន​​បាលកិច្ច គ្រប់គ្រង​ដោយ​​ធនាគារពិភពលោក (World Bank) ក្រោម​ការផ្តល់​​ហិរញ្ញប្បទាន​ពី​រដ្ឋាភិបាល​អាល្លឺម៉ង់ និង​​ស្វីស ​សរុបចំនួន ៩,៦លាន​ដុល្លារ​អាមេរិក។ គម្រោងទាំងនេះ នឹង​ជួយគាំទ្រ​នៃ​​​​​ផែនការ​អនុវត្ត​គណនេយ្យភាពសង្គម ដំណាក់កាលទី២ រយៈពេល​ ៥ឆ្នាំ (២០១៩-២០២៣)៕

 

 

ព័ត៌មានថ្មីៗ + បង្ហាញព័ត៌មានទាំងអស់