លេខាធិការដ្ឋាន គ.ជ.អ.ប. និងកម្មវិធីស្បៀងអាហារពិភពលោក (WFP) បានសហការគ្នារៀបចំសិក្ខាសាលាឆ្លុះបញ្ចាំង ស្ដីពីការអនុវត្តគម្រោង “សន្តិសុខស្បៀង និងការគាំទ្រការស្ដារឡើងវិញរបស់សហគមន៍មូលដ្ឋានដែលរងផលប៉ះពាល់ដោយសារទឹកជំនន់នៅប្រទេសកម្ពុជា (SRELFOOD2)” ក្រោមអធិបតីភាពដឹកនាំដ៏ខ្ពង់ខ្ពស់របស់ឯកឧត្តម ឈុន ប៊ុនណារ៉ា អគ្គនាយករង នៃអគ្គនាយកដ្ឋានរដ្ឋបាល នៃក្រសួងមហាផ្ទៃ និងជាប្រធានអង្គភាពគ្រប់គ្រង និងគាំទ្រកម្មវិធី នៃលេខាធិការដ្ឋាន គ.ជ.អ.ប. នាថ្ងៃទី០៩ ខែកញ្ញា ឆ្នាំ២០២២ នៅខេត្តកំពត។ មានសមាសភាពចូលរួមពីតំណាង WFP រដ្ឋបាលខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង និងខេត្តកំពង់ធំ រដ្ឋបាលស្រុកនៃខេត្តគោលដៅ និងរដ្ឋបាលឃុំគោលដៅ អ្នកផ្ដល់សេវាបច្ចេកទេសឯកជន ព្រមទាំងដៃគូអភិវឌ្ឍន៍និងអង្គការសង្គមស៊ីវិល ដែលមានអ្នកចូលរួមសរុបចំនួន៦៧រូប។
សិក្ខាសាលាមានគោលបំណងចម្បងៗចំនួន៤ រួមមាន៖
- ឆ្លុះបញ្ចាំងអំពីលទ្ធផលនៃការអនុវត្តគម្រោង មេរៀនបទពិសោធ បញ្ហាប្រឈម និងដំណោះស្រាយនានាក្នុងការអនុវត្តគម្រោងកន្លងមក
- ចែករំលែកមេរៀនបទពិសោធន៍ និងចំណេះដឹងនានាក្នុងការអនុវត្តគម្រោងជាមួយគម្រោងដែលឆ្លើយតបនឹងការប្រែប្រួលអាកាសធាតុ សន្តិសុខស្បៀង និងការត្រៀមបង្ការគ្រោះមហន្តរាយនៅថ្នាក់ឃុំ
- ប្រមូលមតិយោបល់ និងអនុសាស្រ្ត នានាអំពីដំណើរការអនុវត្តគម្រោង ការគ្រប់គ្រង ការតាមដានត្រួត ពិនិត្យ និងការថែទាំលទ្ធផលគម្រោង
- ចងក្រងជាឯកសារគម្រោងសម្រាប់ចែករំលែកជាមួយភាគីពាក់ពន្ធ័ដើម្បីប្រើប្រាស់សម្រាប់រៀបចំផែនការយុទ្ធសាស្រ្ត និងការអនុវត្តគម្រោងគាំទ្រឃុំនាពេលអនាគតឱ្យកាន់តែមានប្រសិទ្ធភាព។
សិក្ខាសាលានេះក៏ទទួលបានលទ្ធផលល្អៗមួយចំនួនដូចខាងក្រោម៖
១. ការអនុវត្ត និងការចុះតាមដាន៖
- បង្កើតក្រុមការងារគ្រប់គ្រងគម្រោងដោយមានការកំណត់ច្បាស់លាស់នូវតួនាទី និងការទទួលខុសត្រូវក្នុងការគាំទ្រដល់ការអនុវត្តសកម្មភាពគម្រោង
- ផ្ដល់ការគាំទ្រផ្នែកបច្ចេកទេស និងតម្រង់ទិសអំពីការអនុវត្តគម្រោងយ៉ាងទៀងទាត់
- អ្នកផ្ដល់សេវាបច្ចេកទេសឯកជនមានសមត្ថភាព និងបទពិសោធក្នុងការគាំទ្រឃុំគោលដៅ ដើម្បីអនុវត្តគម្រោងហេដ្ឋារចនាសម្ព័ន្ធដែលមានភាពធន់ទៅនឹងការប្រែប្រួលអាកាសធាតុ
- រៀបចំកិច្ចប្រជុំគម្រោងប្រចាំត្រីមាសជាទៀងទាត់
- ការចូលរួមសកម្មរបស់ប្រជាពលរដ្ឋតាមរយៈការផ្ដល់យោបល់កែលម្អនានា ក្នុងដំណើរការអនុវត្តគម្រោងហេដ្ឋារចនាសម្ព័ន្ធមានសារៈសំខាន់ណាស់ ដើម្បីឱ្យការអនុវត្តគម្រោងមានគុណភាពល្អ និងទាន់ពេលវេលា
២. បញ្ហាប្រឈម៖
- សកម្មភាពមួយចំនួនដូចជាការរៀបចំកិច្ចប្រជុំ វគ្គបណ្ដុះបណ្ដាល ការសិក្សាលទ្ធភាពគម្រោង និងការសាងសង់គម្រោងហេដ្ឋារចនាសម្ព័ន្ធត្រូវបានផ្អាក ឬពន្យារពេល និងកាត់បន្ថយចំនួនអ្នកចូលរួម នៅក្នុងអំឡុងពេលការរីករាលដាលនៃជំងឺកូវីដ-១៩ នៅក្នុងសហគមន៍
- នៅក្នុងអំឡុងពេលនៃការអនុវត្តគម្រោងហេដ្ឋារចនាសម្ព័ន្ធ មានភ្លៀងធ្លាក់ខ្លាំងតាំងពីចាប់ផ្ដើមការសាងសង់ ធ្វើឱ្យទីតាំងគម្រោងត្រូវទឹកលិចពុំអាចបន្តការសាងសង់ ឬត្រូវពន្យារពេលការអនុវត្ត
- ការអនុវត្តគម្រោងមានរយៈពេលខ្លី
- ពេលវេលាអនុវត្តគម្រោង (project timeframe) ខ្លីមិនសមស្របនឹងតម្រូវការអនុវត្តគម្រោងហេដ្ឋារចនាសម្ព័ន្ធដែលត្រូវការពេលវេលាច្រើន ដើម្បីបំពេញនីតិវិធី បែបបទដែលបានតម្រូវក្នុងសេចក្ដីណែនាំស្ដីពីការអនុវត្តគម្រោងមូលនិធិឃុំ សង្កាត់ ជាពិសេសមិនស៊ីសង្វាក់ជាមួយនីតិវិធីពេលវេលារៀបចំផែនការរបស់ឃុំ (commune planning timeframe) ជាហេតុនាំឱ្យឃុំមិនអាចវិភាជថវិកាចូលរួមជាមួយគម្រោងបាន។
៣. អនុសាសន៍៖
- យោងតាមកម្មវិធីកំណែទម្រង់វិមជ្ឈការ និងវិសហមជ្ឈការនៃការអនុវត្តមុខងាររបស់រដ្ឋបាលថ្នាក់ក្រោមជាតិ ស្រុក និងឃុំគួរជាអ្នកដឹកនាំអនុវត្តកម្រោងដោយផ្ទាល់។ ដោយឡែកខេត្តជាអ្នកផ្តល់ការគាំទ្របច្ចេកទេស និងសម្របសម្រួលក្នុងការអនុវត្តគម្រោង។
- គម្រោងហេដ្ឋានរចនាសម្ព័ន្ធខ្នាតតូចដែលមានភាពធន់ទៅនឹងការប្រែប្រួលអាកាសធាតុ គួរមានរយៈពេលនេះការអនុវត្តចាប់ពី២ឆ្នាំឡើងទៅ។
- គម្រោងហេដ្ឋានរចនាសម្ព័ន្ធខ្នាតតូចគួរត្រូវជ្រើសរើសគម្រោងដែលមានគម្លាតនៃការអនុវត្តចាប់ពី៥ឆ្នាំឡើងទៅ និងមានការខូចខាតធ្ងន់ធ្ងរ។
- ការសិក្សាលទ្ធភាព និងការរៀបចំសំណើគម្រោងលម្អិតដោយអ្នកផ្ដល់សេវាបច្ចេកទេសឯកជន គួរត្រូវបញ្ចប់យ៉ាងហោចណាស់នៅខែវិច្ឆិកា
- ប្រភេទគម្រោងដែលឆ្លើយតបទៅនឹងការប្រែប្រួលអាកាសធាតុ និងគ្រោះមហន្តរាយនៅក្នុងសហគមន៍ គួរជាគម្រោងសាងសង់ប្រឡាយបេតុង សាងសង់ផ្លូវបេតុង ការលើកទំនប់ទឹកខ្ពស់ៗ ការស្ដារអាងស្តុកទឹក និងការជីកស្រះសហគមន៍ជាដើម។
