ក្នុង​ពិធីបើក​វគ្គ​បណ្តុះ​បណ្តាល​មានការ​អញ្ជើញ​ចូលរួម​ពីលោក សុខ ជឿន អនុ​ប្រធាន​អង្គភាព​ត្រួតពិនិត្យ​វាយតម្លៃ និងព័ត៌មាន តំណាងដ៏ខ្ពង់ខ្ពស់ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និង​ជាប្រធាន​លេខាធិការ​ដ្ឋាន ​គ.ជ.អ.ប. និងតំណាងធនាគារអភិវឌ្ឍន៍អាស៊ី ក្រុមការងារបច្ចេកទេសនាយកដ្ឋាន ក្រុម​ការងារ​ធនាគារ​ជាតិ​នៃកម្ពុជា ​ប្រធានអង្គភាពច្រកចេញចូលតែមួយ អភិបាលរង​ទទួល​បន្ទុក​ការិយាល័យ​ច្រកចេញ​ចូល​តែមួយ ​ប្រធានការិយាល័យច្រកចេញចូលតែមួយ មន្ត្រីទទួលបន្ទុកការងារបេឡា មន្ត្រី​ទទួល​បន្ទុក​ការងារ​ទទួល​-ប្រគល់ឯកសារ និងមន្ត្រីជួរក្រោយទទួលបន្ទុកវិស័យទេសចរណ៍ សរុប​សមាសភាព​ចូលរួម​ចំនួន១០១នាក់​ក្នុងនោះមានស្រ្តីចំនួន ៣៨នាក់។

អគ្គនាយកដ្ឋានរដ្ឋបាល ក្រសួងមហាផ្ទៃបានទទួលការគាំទ្រពីធនាគារអភិវឌ្ឍន៍អាស៊ីរៀបចំ និងដាក់ឲ្យអនុវត្តសាកល្បងកម្មវិធីព័ត៌មានវិទ្យាសម្រាប់ទទួលពាក្យស្នើសុំ និងផ្តល់សេវារដ្ឋបាលតាមប្រព័ន្ធអនឡាញនៅការិយាល័យច្រកចេញចូលតែមួយនៅរដ្ឋបាលក្រុង ស្រុក ខណ្ឌចំនួន១៣គោលដៅ។ ក្រោយពីដាក់ឲ្យអនុវត្តកន្លងមកទទួលលទ្ធផលល្អប្រសើរ អគ្គនាយកដ្ឋានរដ្ឋបាល ក្រសួងមហាផ្ទៃនឹងពង្រឹកការអនុវត្តសាកល្បងកម្មវិធីព័ត៌មានវិទ្យាសម្រាប់ទទួលពាក្យស្នើសុំ និងផ្តល់សេវារដ្ឋបាលតាមប្រព័ន្ធអនឡាញនៅការិយាល័យច្រកចេញចូលតែមួយនៃរដ្ឋបាលក្រុង និងរដ្ឋបាលខណ្ឌចំនួន៣៨គោលដៅបន្ថែមទៀត។

វគ្គបណ្តុះបណ្តាលនេះរៀបចំឡើងរយៈពេល៣ថ្ងៃ គិតចាប់ពីថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៥ គោលបំណងនៃវគ្គបណ្តុះបណ្តាលនេះគឺដើម្បីធានាថា កម្មវិធីព័ត៌មានវិទ្យានេះអាចដំណើរការបានដោយរលូននៅរដ្ឋបាលក្រុង ខណ្ឌ គោលដៅខាងលើ មុននឹងអាចបន្តពង្រីកការអនុវត្តនៅរដ្ឋបាលក្រុង ស្រុកខណ្ឌក្នុងក្របខ័ណ្ឌទូទាំងប្រទេសផងដែរ៕