បេសកកម្មនេះត្រូវបានរៀបចំឡើងក្នុងគោលបំណងសិក្សាពីលទ្ធផល សមិទ្ធផល និងបញ្ហាប្រឈមនៃការអនុវត្តការងារគណនេយ្យភាពសង្គមជាក់ស្តែងរបស់រដ្ឋបាលសង្កាត់កណ្តោលដុំ ក្រុងច្បារមននៃរដ្ឋបាលខេត្តកំពង់ស្ពឺ ផ្តោតសំខាន់លើការអនុវត្តសាកល្បងនិរន្តរភាពការងារគណនេយ្យភាពសង្គមនៅថ្នាក់សង្កាត់ និងការបន្ស៊ីក្របខណ្ឌពេលវេលាការបង្កើតផែនការសកម្មភាពរួមស្តីពីការងារគណនេយ្យភាពសង្គម (JAAP) ជាមួយនឹងការរៀបចំកម្មវិធីវិនិយោគបីឆ្នាំរំកិលរបស់សង្កាត់។

ក្នុងបេសកកម្មនេះ មានការអញ្ជើញចូលរួមពីតំណាងលេខាធិការដ្ឋាន គ.ជ.អ.ប. ក្រសួងមហាផ្ទៃ ក្រសួងអប់រំ យុវជន និងកីឡា ក្រសួងសុខាភិបាល ធនាគារពិភពលោក ស្ថានទូតអូស្រ្តាលីប្រចាំកម្ពុជា អង្គការទស្សនៈពិភពលោកអន្តរជាតិ រដ្ឋបាលខេត្ត មន្ទីរពាក់ព័ន្ធ រដ្ឋបាលក្រុង និងអ្នកពាក់ព័ន្ធ សរុបចំនួន៨៥រូប ស្រី៣៣រូប។

សូមគូសបញ្ជាក់ថាដំណើរទស្សនកិច្ចនៃបេសកកម្មគាំទ្រការអនុវត្តគម្រោងគណនេយ្យភាពសង្គមលើកទី១០ របស់ធនាគារពិភពលោក នឹងប្រព្រឹត្តទៅនាថ្ងៃទី២៥-២៧ ខែវិច្ឆិកា ឆ្នាំ២០២៥ នៅក្នុងដែនរដ្ឋបាលក្រុងច្បារមន ស្រុកបរសេដ្ឋ ខេត្តកំពង់ស្ពឺ និងរដ្ឋបាលស្រុកអង្គរជ័យ ខេត្តកំពត៕