កំពង់ធំ៖ ក្រុមការងារថ្នាក់ជាតិ និងក្រុមការងារខេត្តកំពង់ធំ នៃគម្រោងបែងចែកដីដើម្បីសង្គមកិច្ច និងការអភិវឌ្ឍ សេដ្ឋកិច្ចជំហាន២ (LASED II) បានរៀបចំសម្របសម្រួលដល់ក្រុមការងាររបស់ធនាគារពិភពលោក ដើម្បីចុះសិក្សាស្វែងយល់ និងសំណេះសំណាលជាមួយសម្បទានិកនៅក្នុងដីសម្បទានសង្គមកិច្ចដែលស្ថិតនៅក្នុងឃុំទីពោ ស្រុកសន្ទុក ខេត្តកំពង់ធំ កាលពីថ្ងៃពុធ ៨រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៦ ខែមិថុនា ឆ្នាំ២០១៨។ នៅក្នុងឱកាសនោះមានសម្បទានិកចំនួនប្រមាណជាង៥០នាក់បានចូលរួមនិងបានជជែកពិភាក្សា ដោយផ្ទាល់ជាមួយក្រុមការងាររបស់ធនាគារពិភពលោក។ ក្រោយពីបានស្តាប់របាយការណ៍ដែលជម្រាបជូនដោយ មន្ត្រីនៃគម្រោង LASED II ប្រចាំខេត្តកំពង់ធំ ក្រុមការងាររបស់ធនាគារពិភពលោកបានជួបសំណេះសំណាលជាមួយសម្បទានិកដើម្បីស្វែងយល់ពីការប្រកបរបរចិញ្ចឹមជីវិតប្រចាំថ្ងៃ ការងារគ្រប់គ្រង និងការថែទាំហេដ្ឋារចនា សម្ព័ន្ធក្នុងសហគមន៍។ បន្ទាប់ពីការជួបប្រជុំជាមួយសម្បទានិករួមមក ក្រុមការងាររបស់ធនាគារពិភពលោកក៏បានធ្វើទស្សនកិច្ច និងជួបជាមួយសិស្សានុសិស្ស និងលោកគ្រូអ្នកគ្រូ ដើម្បីស្វែងយល់ពីការបង្រៀន និងការរៀនសូត្រនៅទីនោះផងដែរ។ ក្រោយមក ក្រុមការងាររបស់ធនាគារពិភពលោកក៏បានបន្តដំណើរចុះជួបជាមួយសម្បទានិកតាមគ្រួសារដែលបានចិញ្ចឹមមាន់ និងដាំបន្លែដែលជាមុខរបរបន្ទាប់បន្សំបន្ទាប់ពីការធ្វើស្រែចម្ការ និងដាំ ដំណាំផ្សេងៗ។
ជារួម ក្រុមការងាររបស់ធនាគារពិភពលោកបានកត់សម្គាល់ឃើញថា ជីវភាពរស់នៅរបស់សម្បទានិក នៅក្នុងឃុំទីពោ ស្រុកសន្ទុក ខេត្តកំពង់ធំ មានភាពល្អប្រសើរឡើងជាបន្តបន្ទាប់ ក្រោយពីបានមករស់នៅលើដីថ្មី នេះតាមរយៈការសាងសង់លំនៅឋាន ការបង្កបង្កើនផល ការដាំដំណាំគ្រប់ប្រភេទ និងការចិញ្ចឹមសត្វ ព្រមទាំងមុខ របរបន្ទាប់បន្សំផ្សេងៗនៅលើដីរបស់ខ្លួនដែលបានទទួលពីគម្រោង LASED II។ នៅក្នុងឱកាសនោះ សម្បទានិកក៏បានសម្តែងនូវភាពសប្បាយរីករាយរបស់ខ្លួនប្រាប់ដល់ក្រុមការងាររបស់ធនាគារពិភពលោក បន្ទាប់ពីពួកគាត់ទទួល បានវិញ្ញាបនបត្រសម្គាល់ម្ចាស់អចលនវត្ថុ (ប្លង់ដី) ពីរាជរដ្ឋាភិបាលក្នុងពេលថ្មីៗនេះ។ មុននឹងបញ្ចប់ដំណើរ ទស្សនកិច្ចរបស់ខ្លួន ក្រុមការងាររបស់ធនាគារពិភពលោកក៏បានផ្តាំផ្ញើដល់សម្បទានិកទាំងអស់ឱ្យបន្តខិតខំប្រឹងប្រែងក្នុងការបង្កបង្កើនផល ដើម្បីបង្កើនប្រាក់ចំណូលរបស់គ្រួសារ និងរួមសហការគ្នាថែរក្សាសមិទ្ធផលនានាដែលបាន កសាងនៅក្នុងសហគមន៍របស់ខ្លួន ដើម្បីធានាការប្រើប្រាស់ឱ្យបានយូរអង្វែង៕
អត្ថបទពាក់ព័ន្ធ