រាជធានីភ្នំពេញ៖ នៅថ្ងៃពុធ ៩កើត ខែជេស្ឋ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២៣ ខែឧសភា ឆ្នាំ២០១៨នេះ ឯកឧត្តម ង៉ាន់ ចំរើន អនុរដ្ឋលេខាធិការ ក្រសួងមហាផ្ទៃ និងជាអនុប្រធានប្រតិបត្តិនៃលេខាធិការដ្ឋាន គ.ជ.អ.ប បានអញ្ជើញបើកសិក្ខាសាលាស្ដីពី ការបង្ហាញលទ្ធផលនៃការប្រមូលទិន្នន័យដើមគ្រាក្នុងការគ្រប់គ្រងសំរាម សំណល់រឹងទីប្រជុំជន នៅសណ្ឋាគាររ៉ាហ្វលឡឺរ៉ូយាល់ (Raffle Hotel Le Royal)។ សិក្ខាសាលានេះរៀបចំឡើងដោយកម្មវិធីអភិវឌ្ឍន៍សហប្រជាជាតិ (United Nations Development Programme) សហការជាមួយលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ក្រសួងបរិស្ថាន និងក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច)។
នៅក្នុងសិក្ខាសាលានេះ នាយករបស់ UNDP លោក Nick Beresford មើលឃើញថា កម្ពុជាមានបញ្ហាប្រឈមក្នុងការគ្រប់គ្រងសំរាម ខណៈពេលសេដ្ឋកិច្ចមានកំណើនយ៉ាងឆាប់រហ័សក្នុងរយៈពេលជាងពីរទស្សវត្សរ៍មកនេះ។ ដើម្បីដោះស្រាយបញ្ហាគ្រប់គ្រងសំរាម សំណង់រឹងនៅទីប្រជុំជននេះ លោកបានបន្តមានប្រសាសន៍ថា វាទាមទារឱ្យមានការចូលរួមពីគ្រប់ភាគីពាក់ព័ន្ធទាំងអាជា្ញធរ និងប្រជាពលរដ្ឋក្នុងសង្គមទាំងមូល។
ជាក់ស្តែង លោកបានលើកឡើងពីបទពិសោធន៍នៃការគ្រប់គ្រងសំរាមក្នុងចក្រភពអង់គ្លេសដោយផ្ទាល់ថា អាជ្ញាធរបានចេញវិធានការគ្រប់គ្រងស្បោង ឬថង់ប្លាស្ទិក ដោយមិនតម្រូវឱ្យមានការចែកចាញថង់ប្លាស្ទិកនៅតាមទីផ្សារនានាឥតគិតថ្លៃឡើយ។ ហេតុនេះ ប្រជាពលរដ្ឋអង់គ្លេសភាគច្រើនបានយល់ពីការការពារបរិស្ថាន និងចូលរួមលែងប្រើប្រាស់ថង់ជ័រប្លាស្ទិក។ លោកសង្ឃឹមជឿជាក់ថា ប្រជាពលរដ្ឋកម្ពុជានឹងផ្លាស់ប្តូរទម្លាប់ប្រើប្រាស់ថង់ប្លាស្ទិកដែរ នៅពេលទីផ្សារនានាចាប់ផ្តើមលែងចែកចាយថង់ប្លាស្ទិកដល់អតិថិជនខ្លួនដោយឥតគិតថ្លៃ។
នៅក្នុងឱកាសបើកសិក្ខាសាលានេះដែរ ឯកឧត្តម ង៉ាន់ ចំរើន អនុរដ្ឋលេខាធិការក្រសួងមហាផ្ទៃ និងជាអនុប្រធានប្រតិបត្តិនៃលេខាធិការដ្ឋាន គ.ជ.អ.ប បានមានប្រសាសន៍គាំទ្រការលើកឡើងរបស់នាយក UNDP ដែលសង្កេតឃើញថា កម្ពុជាមានកំណើនសេដ្ឋកិច្ចយ៉ាងរហ័សជាងពីរទស្សវត្សរ៍ដែលនាំឱ្យមានការរីកចំរើននៅតាមតំបន់ទីប្រជុំជននានា ខណៈអាជ្ញាធរពុំទាន់អាចមានលទ្ធភាព និងធនធានគ្រប់គ្រាន់ក្នុងការគ្រប់គ្រងសំរាម សំណល់រឹងនៅទីប្រជុំជន ពិសេសគឺនៅថ្នាក់រដ្ឋបាលក្រុង និងស្រុក។
ឯកឧត្តមបានមានប្រសាសន៍កត់សម្គាល់ថា ការគ្រប់គ្រងសំរាម សំណល់រឹងទីប្រជុំជននៅតែជាបញ្ហាប្រឈមនៅឡើយនៅក្នុងថ្នាក់រដ្ឋបាលក្រុង និងស្រុក បើទោះបីជាអនុក្រឹត្យស្តីពី ការគ្រប់គ្រងសំរាម សំណល់រឹងទីប្រជុំជន ត្រូវបានដាក់ឱ្យអនុវត្តតាំងពីខែសីហា ឆ្នាំ២០១៥ ហើយ គ.ជ.អ.ប និងក្រសួងពាក់ព័ន្ធបានចេញសៀវភៅណែនាំក៏ដោយ។
យ៉ាងណា ឯកឧត្តមបានបន្តមានប្រសាសន៍បញ្ជាក់ជាថ្មីអំពីឆន្ទៈរបស់រាជរដ្ឋាភិបាលក្នុងការអនុវត្តគោលនយោបាយវិមជ្ឈការ និងវិសហមជ្ឈការលើការបន្តផ្ទេរមុខងារ និងធនធានទៅឱ្យរដ្ឋបាលថ្នាក់ក្រោមជាតិ ពិសេសគឺ នៅរដ្ឋបាលក្រុង ស្រុក ដែលស្ថិតនៅកៀកជិតប្រជាពលរដ្ឋ។
ដើម្បីជំរុញការគ្រប់គ្រងសំរាមនេះ ឯកឧត្តម ង៉ាន់ ចំរើន បានផ្តល់អនុសាសន៍មួយចំនួនដល់អាជ្ញាធរថ្នាក់ក្រោមជាតិ ហើយឯកឧត្តមបានបង្ហើបឱ្យដឹងថា នៅពេលខាងមុខនេះ ក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន និងក្រសួងមហាផ្ទៃនឹងចេញប្រកាសរួមមួយអំពី ការកំណត់តារាងតម្លៃជាអតិប្បរមាក្នុងការប្រមូលសំរាមនៅទូទាំងប្រទេស ជាពិសេសក្នុងថ្នាក់រដ្ឋបាលក្រុង និងស្រុក ដើម្បីកំណត់តម្លៃប្រមូលសំរាមឱ្យបានច្បាស់លាស់។
ឯកឧត្តមមានបន្តប្រសាសន៍លើកទឹកចិត្តអាជ្ញាធររដ្ឋបាលថ្នាក់ក្រោមជាតិឱ្យចូលរួមផ្តល់យោបល់ និងបញ្ហាប្រឈមដែលខ្លួនបានជួបប្រទះ ដើម្បីដាក់បញ្ចូលក្នុងរបាយការណ៍ និងពិនិត្យដោះស្រាយឱ្យកាន់តែល្អប្រសើរឡើង។
សូមបញ្ជាក់ថា សិក្ខាសាលានេះរៀបចំឡើងរយៈពេលពីរថ្ងៃ គឺថ្ងៃទី២៣ និង២៤ ខែឧសភា ឆ្នាំ២០១៨។ សិក្ខាសាលានេះមានគោលបំណង៖ ១. បង្ហាញលទ្ធផលនៃការប្រើប្រាស់គំរូបង្កើតសំណល់ និងការសន្មត់សំខាន់ៗ ដែលត្រូវបានប្រើប្រាស់ ២. បង្ហាញពីព័ត៌មានសង្ខេបតាមខេត្តនីមួយៗ ៣. ពិភាក្សា និងផ្ដល់ព័ត៌មានត្រឡប់លើការសន្មត់ ដែលធ្វើឡើងក្នុងការប្រមូលទិន្នន័យនៅថ្នាក់ខេត្ត និងការបង្កើតគំរូបង្កើតសំរាម និង៤. រៀបចំកិច្ចពិភាក្សាតាមក្រុម ជាមួយនឹងតំណាងខេត្តនីមួយៗ ដើម្បីបន្តប្រមូលព័ត៌មានដែលនៅខ្វះចន្លោះអំពីការគ្រប់គ្រងសំរាម សំណល់នៅថ្នាក់ខេត្ត។ សមាសភាពអញ្ជើញចូលរួមសិក្ខាសាលានេះរួមមាន៖ តំណាងលេខាធិការដ្ឋាន គ.ជ.អ.ប តំណាងក្រសួងបរិស្ថាន តំណាងក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច) តំណាង UNDP ទីចាត់ការផែនការ និងវិនិយោគ ទីចាត់ការកិច្ចការគ្រប់គ្រងកាកសំណល់រាជធានីភ្នំពេញ តំណាងមន្ទីរបរិស្ថានរាជធានី ខេត្ត តំណាងក្រុង ស្រុក ក្រុមហ៊ុនស៊ិនទ្រី ក្រុមហ៊ុនសារ៉ុម ត្រេឌីន និងតំណាងក្រុមហ៊ុន GAEA សរុបប្រមាណ ៩០រូប។