ការពិនិត្យពិភាក្សាលើលទ្ធផលនៃការសិក្សាសម្រាប់ការដាក់ឱ្យដំណើរការនូវសាលាជាតិរដ្ឋបាលមូលដ្ឋាន គឺជារបៀបវារៈទី៦ ក្នុងចំណោមរបៀបរយៈទាំងប្រាំពីរនៃកិច្ចប្រជុំលើកទី១៦ របស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ដែលបានប្រព្រឹត្តទៅកាលពីថ្ងៃទី២២ ខែមិថុនា ឆ្នាំ២០១៨។
តាមរយៈអនុក្រឹត្យលេខ១៩២អនក្រ.បក ចុះថ្ងៃទី១៤ ខែកញ្ញា ឆ្នាំ២០១៦ ស្តីពីការបង្កើតសាលាជាតិរដ្ឋបាលមូលដ្ឋាន រាជរដ្ឋាភិបាលកម្ពុជាបានបង្កើត សាលាជាតិរដ្ឋបាលមូលដ្ឋាន (ហៅកាត់ជាភាសាខ្មែរថា «ស.ជ.រ.ម» និងជាភាសាអង់គ្លេសថា «NASLA» ឱ្យស្ថិតនៅក្រោមឱវាទក្រសួងមហាផ្ទៃ ក្នុងគោលបំណងផ្តល់ការអភិវឌ្ឍសមត្ថភាពដល់មន្ត្រីរាជការ ក្រុមប្រឹក្សានៃរដ្ឋបាលថ្នាក់ក្រោមជាតិ សិស្ស និស្សិត និងអ្នកពាក់ព័ន្ធដទៃទៀត ព្រមទាំងសិក្សាស្រាវជ្រាវអំពីអភិបាលកិច្ច ការអភិវឌ្ឍមូលដ្ឋាន ការលើកកម្ពស់ស្វ័យភាពមូលដ្ឋាន និងការគ្រប់គ្រងរដ្ឋបាលថ្នាក់ក្រោមជាតិ។
សាលាជាតិរដ្ឋបាលមូលដ្ឋាន (NASLA) ប្រៀបដូចជា សាលាភូមិន្ទរដ្ឋបាលសម្រាប់មន្ត្រីថ្នាក់ក្រោមជាតិ ពោលគឺជាយន្តការធានានិរន្តភាពនៃការបណ្តុះបណ្តាលដល់មន្ត្រីថ្នាក់ក្រោមជាតិ ដោយពង្រឹងសមត្ថភាពដល់មន្ត្រីគ្រប់ក្របខ័ណ្ឌ «ក» «ខ» និង «គ» ចាប់ពីមន្ត្រីថ្មីរហូតដល់ថ្នាក់អគ្គនាយក និងអភិបាលរាជធានី ខេត្ត ដែលមានជំនាញគ្របដណ្តប់លើប្រធានបទពាក់ព័ន្ធការគ្រប់គ្រងរដ្ឋបាលថ្នាក់ក្រោមជាតិ និងការផ្តល់សេវានៅមូលដ្ឋាន។ NASLA លើកម្ពស់វិជ្ជាជីវៈរបស់មន្ត្រីរដ្ឋបាលថ្នាក់ក្រោមជាតិ និងជាវិទ្យាស្ថានទាន់សម័យ ដែលអាចផ្តល់ការបណ្តុះបណ្តាលមានគុណភាព ហើយសិក្ខាកាមអាចមានមោទនៈភាពនៅពេលបញ្ចប់ការសិក្សានៅទីនេះ។
បើយោងរបាយការណ៍សង្ខេបអំពីការសិក្សាលទ្ធផលនៃការរៀបចំដាក់ឱ្យដំណើរការសាលាជាតិរដ្ឋបាលមូលដ្ឋានបានឱ្យដឹងថា កម្មវិធីសិក្សាចែកជា ៤ ប្រភេទ៖ (១) វគ្គបឋម សម្រាប់មន្ត្រីថ្មី (២) វគ្គអាជីពការងារ សម្រាប់មន្ត្រីឡើងឋានន្តរស័ក្តិ (៣) វគ្គវិក្រឹត្យការ សម្រាប់បំប៉នសមត្ថភាពប្រចាំឆ្នាំ និង (៤) វគ្គជំនាញ សម្រាប់មន្ត្រីជំនាញនៅតាមអង្គភាព។ វគ្គបឋម និងវគ្គអាជីពការងារ ជាវគ្គមធ្យមដែលអាចមានរយៈពេលរហូតដល់បីខែ។ ដោយឡែកវគ្គវិក្រឹត្យការ និងវគ្គជំនាញ មានរយៈពេលខ្លីជាង។ ផ្អែកតាមតម្រូវការនេះ តាមការប៉ាន់ស្មានបឋមបន្ទប់សិក្សារបស់សាលាជាតិរដ្ឋបាលមូលដ្ឋាននឹងត្រូវប្រើប្រាស់ពេញម៉ោងចាប់ពី ៣៥ ទៅ ៤០សប្តាហ៍ ក្នុងមួយឆ្នាំ។ មុខងារស្នូល ២ របស់សាលានេះ គឺការបណ្តុះបណ្តាល និងការស្រាវជ្រាវ។
យោងរបាយការណ៍ដដែលបានបញ្ជាក់ផងដែរថា តាមការសិក្សាបានស្នើរៀបចំឱ្យមានគម្រោងមួយដែលមានរយៈពេល៨ឆ្នាំ ក្នុងនោះ ៣ឆ្នាំដំបូងផ្តោតលើការសាងសង់អគារ និងបំពាក់បរិក្ខានានារបស់សាលា និង៥ឆ្នាំទៀត ជាការដាក់ឱ្យដំណើរការនូវកម្មវិធីសិក្សា ព្រមទាំងមុខងារដទៃទៀតរបស់សាលា។
រាជរដ្ឋាភិបាលបានឯកភាពជាគោលការណ៍រួចហើយលើសំណើសុំរបស់ គ.ជ.អ.ប ក្នុងការស្នើសុំប្រើប្រាស់ថវិកាកម្ចីរបស់ ADB ដើម្បីសាងសង់សាលាជាតិរដ្ឋបាលមូលដ្ឋាននេះ។ ការសិក្សាដែលគាំទ្រដោយ ADB អំពីលទ្ធភាពនៃការសាងសង់ និងដំណើរការរបស់សាលានេះ ក៏បានរៀបចំបញ្ចប់រួចរាល់ហើយដែរ។ ចំពោះជំហានបន្ទាប់នឹងស្នើសុំគោលការណ៍អនុម័តរបស់ គ.ជ.អ.ប លើលទ្ធផលនៃការសិក្សានេះ ដើម្បីជាមូលដ្ឋានក្នុងការបន្តកិច្ចសហការរវាងក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ជាមួយធនាគារអភិវឌ្ឍន៍អាស៊ី (ADB) ក្នុងការរៀបចំជាឯកសារគម្រោងជាក់លាក់ដែលត្រូវផ្តល់ហិរញ្ញប្បទានកម្ចីពី ADB៕