ក្រសួងមហាផ្ទៃ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍ថា ក្នុងនាមរាជរដ្ឋាភិបាលកម្ពុជា គឺប្តេជ្ញាបន្តពង្រឹងលទ្ធិប្រជាធិបតេយ្យ នីតិរដ្ឋ និងលំហនយោបាយ តាមរយៈសេចក្តីថ្លែងការណ៍ដែលបានចុះផ្សាយកាលពីថ្ងៃទី ០៣ ខែធ្នូ ឆ្នាំ២០១៨កន្លងទៅ ដើម្បីភាពរីកចំរើន និងឈានទៅជាប្រទេសដែលមានការអភិវឌ្ឍនៅលើសកលលោក។ សម្តេចក្រឡាហោម ស ខេង បានមានប្រសាសន៍បែបនេះក្នុងឱកាសអញ្ជើញជាអធិបតីដ៏ខ្ពង់ខ្ពស់បើកវេទិកាភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល លើកទី៣ នាព្រឹកថ្ងៃព្រហស្បតិ៍ ទី២៩ ខែសីហា ឆ្នាំ២០១៩ នៅទីស្តីការក្រសួងមហាផ្ទៃ។
សម្តេចក្រឡាហោមបានបញ្ជាក់ថា រាជរដ្ឋាភិបាលនឹងអនុវត្តផ្តោតលើចំណុចសំខាន់ៗចំនួន ០៥រួមមាន៖ ១.ការលើកកម្ពស់លទ្ធិប្រជាធិបតេយ្យ និងនីតិរដ្ឋបន្ថែមទៀត ជាពិសេសអនុញ្ញាតឱ្យបុគ្គលដែលជាប់បម្រាមធ្វើសកម្មភាពនយោបាយ អាចចាប់ផ្តើមធ្វើសកម្មភាពនយោបាយវិញបាន, ២.ការលើកកម្ពស់ភាពជាដៃគូពិតប្រាកដជាមួយអង្គការសង្គមស៊ីវិល, ៣.វិធានការដោះស្រាយពាក់ព័ន្ធសិទ្ធិការងារ និងសហជីព, ៤.ការលើកតម្កើងសិទ្ធិសេរីភាពសារព័ត៌មាន និងសេរីភាពបញ្ចេញមតិស្របតាមរដ្ឋធម្មនុញ្ញ និងច្បាប់នានាជាធរមាន, ៥.បន្តដោះស្រាយជម្លោះដីធ្លីដែលនៅសេសសល់ប្រកបដោយតម្លាភាព និងគណនេយ្យភាព ព្រមទាំងជំរុញ និងពន្លឿនការចុះបញ្ជីដីធ្លីនៅទូទាំងប្រទេស។
សម្តេចក្រឡាហោមបានបន្ថែមថា រាជរដ្ឋាភិបាលនីតិកាលទី៦ នៃរដ្ឋសភា បានដាក់ចេញនូវយុទ្ធសាស្រ្តចតុកោណដំណាក់កាលទី៤ ដោយបានធ្វើការពង្រឹងពង្រីកនូវវិសាលភាព សម្រិតសម្រាំងបន្ថែម និងធ្វើអាទិភាវូប-នីយកម្មមុំនីមួយៗនៃចតុកោណទាំង៤ ព្រមទាំងកែលម្អរបៀបវារៈគោលនយោបាយ និងយន្តការ អនុវត្តមួយចំនួនឱ្យកាន់តែប្រសើរឡើងថែមទៀត ដើម្បីកសាងមូលដ្ឋានគ្រឹះចាំបាច់ទាំងឡាយក្នុងចក្ខុវិស័យដោយប្រែក្លាយកម្ពុជាពីប្រទេសដែលមានចំណូលមធ្យមកម្រិតទាប ទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ ព្រមទាំងនាំប្រទេសជាតិយើងឆ្ពោះទៅកាន់ឋានៈជាប្រទេសដែលមានចំណូលខ្ពស់នៅឆ្នាំ២០៥០ ខាងមុខ។
សម្តេចក្រឡហោមបានគូសបញ្ជាក់បន្តថា ឈរលើមូលដ្ឋាននេះដែរ រាជរដ្ឋាភិបាលក៏នៅតែបន្តកិច្ចសន្ទនា សំដៅប្រមូលនូវគំនិតព្រមទាំងធនធានមនុស្សពីគ្រប់ប្រភព ដោយគ្មានការរើសអើង ឬបែងចែកបក្សពួក និន្នាការនយោបាយ តាមរយៈ “ឧត្តមក្រុមប្រឹក្សាពិគ្រោះ និងផ្តល់យោបល់” និងការរៀបចំឱ្យមានការពិគ្រោះយោបល់ក្នុងដំណើរការតាក់តែងក្របខណ្ឌគោលនយោបាយ និងច្បាប់នានា ដោយអនុញ្ញាតឱ្យមានការចូលរួមពីតំណាងគណបក្សនយោបាយ អង្គការសង្គមស៊ីវិល និងផ្នែកឯកជនដែលមានការពាក់ព័ន្ធ ព្រមទាំងបានរៀបចំកិច្ចប្រជុំពិគ្រោះយោបល់ជាមួយគណបក្សនយោបាយដែលបានចុះបញ្ជីនៅក្រសួងមហាផ្ទៃ ដើម្បីផ្សព្វផ្សាយ និងស្វែងយល់ពីការអនុវត្តច្បាប់ស្តីពីគណបក្សនយោបាយ៕
ប្រភពពីនាយកដ្ឋានព័ត៌មានវិទ្យា
