រាជធានីភ្នំពេញ៖ នៅព្រឹកថ្ងៃអង្គារ ៥កើត ខែទុតិយាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៧ ខែកក្កដា ឆ្នាំ២០១៨នេះ អង្គភាពត្រួតពិនិត្យ វាយតម្លៃ និងព័ត៌មាន នៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានរៀបចំវគ្គបណ្តុះបណ្តាលស្តីពី ការសម្របសម្រួលកម្មវិធីវិទ្យុ និងទូរទស្សន៍ ដើម្បីឱ្យមន្ត្រីមានសមត្ថភាពក្នុងការសម្របសម្រួលកម្មវិធីវិទ្យុ និងទូរទស្សន៍នាពេលខាងមុខ។
សមាសភាពមន្ត្រីចូលរួមក្នុងវគ្គបណ្តុះបណ្តាលនេះមានចំនួនសរុប ២០រូប មកពីលេខាធិការដ្ឋាន គ.ជ.អ.ប ក្រសួងមហាផ្ទៃ និងក្រសួងបរិស្ថាន។
ថ្លែងក្នុងពិធីបើកវគ្គបណ្តុះបណ្តាលក្នុងនាម ឯកឧត្តម ជាម ប៉េអា ប្រធានអង្គភាពត្រួតពិនិត្យ វាយតម្លៃ និងព័ត៌មាន លោក ម៉ន ប៊ុនថារិទ្ធ ប្រធានការិយាល័យទំនាក់ទំនង និងផ្សព្វផ្សាយព័ត៌មានបានស្វាគមន៍មន្ត្រីទាំងអស់ដែលបានចូលរួមវគ្គបណ្តុះបណ្តាលស្តីពី ការសម្របសម្រួលកម្មវិធីវិទ្យុ និងទូរទស្សន៍។ លោកប្រធានការិយាល័យទំនាក់ទំនង និងផ្សព្វផ្សាយព័ត៌មាននៃលេខាធិការដ្ឋាន គ.ជ.អ.ប បានមានប្រសាសន៍ថា វគ្គបណ្តុះបណ្តាលដ៏មានសារៈនេះមានគោលបំណងបង្កើនសមត្ថភាពមន្ត្រីឱ្យយល់ដឹង និងអាចធ្វើការសម្របសម្រួលកម្មវិធីវិទ្យុ និងទូរទស្សន៍កាន់តែប្រសើរ។
សូមជម្រាបជូនថា សិក្ខាកាមចូលរួមវគ្គបណ្តុះបណ្តាលនេះបានស្វែងយល់ពីតួនាទីរបស់អ្នកសម្របសម្រួល ការត្រៀមរៀបចំកម្មវិធី ដំណើរការកម្មវិធី ការត្រៀមកម្រងសំណួរ និងការជជែកពិភាក្សាជាមួយវាគ្មិនជាដើម។