ការពិនិត្យពិភាក្សាអំពីវឌ្ឍនភាព និងដំណោះស្រាយបញ្ហាប្រឈមនៃការរៀបចំយន្តការច្រកចេញចូលតែមួយនៅរដ្ឋបាលថ្នាក់ក្រោមជាតិ គឺជារបៀបវារៈទី៥ ក្នុងចំណោមរបៀបរយៈទាំងប្រាំពីរនៃកិច្ចប្រជុំលើកទី១៦ របស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ដែលបានប្រព្រឹត្តទៅកាលពីថ្ងៃទី២២ ខែមិថុនា ឆ្នាំ២០១៨។
កន្លងមកការិយាល័យច្រកចេញចូលតែមួយ និងការិយាល័យប្រជាពលរដ្ឋត្រូវបានបង្កើតនៅថ្នាក់ក្រុង ស្រុក ខណ្ឌ សរុបជារួម ពីឆ្នាំ២០០៥ – ២០១៧ មានការិយាល័យចំនួន ៥៣ (២៦ក្រុង ១២ខណ្ឌ និង១៤ស្រុក) និងកំពុងរៀបចំបង្កើតការិយាល័យច្រកចេញចូលតែមួយ និងការិយាល័យប្រជាពលរដ្ឋចំនួន ៣១ស្រុកបន្ថែមទៀត ដែលត្រូវដាក់ឱ្យដំណើរការអនុវត្តនៅក្នុងត្រីមាសទី៤ ឆ្នាំ២០១៨នេះ។
បច្ចុប្បន្នការិយាល័យច្រកចេញចូលតែមួយ បានកំពុងផ្តល់សេវាចំនួនប្រមាណ ១២៨ប្រភេទសេវា នៃវិស័យចំនួន១៣។ បើគិតពីឆ្នាំ២០០៥ ដល់ ២០១៧ ការិយាល័យច្រកចេញចូលតែមួយបានផ្តល់សេវា ២.៦០៥.២៤៤ សេវា និងទទួលចំណូលសរុប ៥៦.០៦០.៨៤៤.០៦០៛ (១៤លានដុល្លារសហរដ្ឋអាមេរិក)។
ឆ្នាំ២០១១ ដល់ ២០១៨ ការិយាល័យប្រជាពលរដ្ឋក្រុង ស្រុក ខណ្ឌ បានទទួលពាក្យបណ្តឹងតវ៉ា ការសាកសួរព័ត៌មាន និងសំណើសំណូមពរនានាបានចំនួន ២០.៧៣០ករណី ក្នុងនោះរួមមាន៖ (១) បណ្តឹងពាក់ព័ន្ធការផ្តល់សេវារដ្ឋបាលស្ថិតក្នុងសមត្ថកិច្ចរដ្ឋបាលក្រុង ស្រុកចំនួន ១.១៩១ករណី បានសម្រុះសម្រួលដោះស្រាយបាន ១.០៩៤ករណី ស្នើនឹង៩២%។ (២) បណ្តឹងក្រៅសមត្ថកិច្ចរបស់រដ្ឋបាលក្រុង ស្រុក ចំនួន ៧៦៧ករណី បានបញ្ជូនទៅស្ថាបន័នានាមានសមត្ថកិច្ច (៣) ការសាកសួរព័ត៌មានផ្សេងៗចំនួន ១៧.៦៤៣ករណី និង (៤) សំណើរសំណូមពរចំនួន ១.០៩២ករណី។
ចំពោះការផ្សព្វផ្សាយអនុក្រឹត្យ និងលិខិតបទដ្ឋាននានាក្នុងឆ្នាំ២០១៧កន្លងទៅបានរៀបចំកិច្ចប្រជុំផ្សព្វផ្សាយ និងណែនាំអនុវត្តអនុក្រឹត្យលេខ១៨ អនុក្រឹត្យលេខ១៩ និងលិខិតបទដ្ឋានផ្សេងទៀតសម្រាប់បង្កើតអង្គភាពច្រកចេញចូលតែមួយ និងការិយាល័យប្រជាពលរដ្ឋនាថ្ងៃទី១៣ ខែកញ្ញា ឆ្នាំ២០១៧ ដល់ក្រសួង ស្ថាបន័ និងរដ្ឋបាលថ្នាក់ក្រោមជាតិ ហើយរាជធានី ខេត្តទាំង២៥ ក៏បានផ្សព្វផ្សាយអនុក្រឹត្យទាំងពីរ និងលិខិតបទដ្ឋានពាក់ព័ន្ធដល់មន្ទីរ អង្គភាព ក្រុង ស្រុក ខណ្ឌ និងឃុំ សង្កាត់ និងអ្នកពាក់ព័ន្ធនានា។
ទិសដៅសំខាន់ៗសម្រាប់អនុវត្តក្នុងឆ្នាំ២០១៨នេះ រួមមានចំនួន ៦ ដូចខាងក្រោម៖
១. រៀបចំលិខិតបទដ្ឋាន និងឯកសារចាំបាច់នានាសម្រាប់គាំទ្រការអនុវត្តអនុក្រឹត្យលេខ១៨ និងអនុក្រឹត្យលេខ១៩
២. ត្រៀមបើកវគ្គបណ្តុះបណ្តាលអំពីនីតិវិធី និងបែបបទនៃការផ្តល់សេវាដល់មន្រ្តីអង្គភាពច្រកចេញចូលតែមួយចំនួន ៩ខេត្តទៀត នាថ្ងៃទី២៦-២៩ ខែមិថុនាខាងមុខនេះ
៣. បើកវគ្គបណ្តុះបណ្តាលបច្ចេកទេសតាមវិស័យនីមួយៗ នាត្រីមាសទី៣នៃឆ្នាំ២០១៨
៤. បើកវគ្គបណ្តុះបណ្តាលការិយាល័យប្រជាពលរដ្ឋទាំង២៥រាជធានី ខេត្ត ក្នុងត្រីមាសទី៣នៃឆ្នាំ២០១៨
៥. រៀបចំដាក់ឲ្យដំណើរការផ្លូវការនូវអង្គភាពច្រកចេញចូលតែមួយរាជធានី ខេត្ត នាខែកក្កដា ឆ្នាំ២០១៨ខាងមុខនេះ
៦. រៀបចំដាក់ឲ្យដំណើរការផ្លូវការនូវការិយាល័យច្រកចេញចូលតែមួយ និងការិយាល័យប្រជាពលរដ្ឋចំនួន ៣១ស្រុក នាខែធ្នូ ឆ្នាំ២០១៨៕