រាជធានីភ្នំពេញ៖ នៅព្រឹកថ្ងៃចន្ទ ៦រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៤ ខែមិថុនា ឆ្នាំ២០១៨ ឯកឧត្តម ង៉ាន់ ចំរើន អនុរដ្ឋលេខាធិការ ក្រសួងមហាផ្ទៃ និងជាអនុប្រធានប្រតិបត្តិនៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានអញ្ជើញ បើកសិក្ខាសាលាស្តីពី ការផ្សព្វផ្សាយ និងជំរុញការអនុវត្តប្រព័ន្ធទិន្នន័យ គ.ជ.អ.ប ដែលរៀបចំឡើងក្នុងសាលាប្រជុំលេខាធិការដ្ឋាន គ.ជ.អ.ប ដោយមានការអញ្ជើញ ចូលរួមពីសំណាក់ឯកឧត្តម លោកជំទាវអភិបាលរងនៃគណៈអភិបាលរាជធានី ខេត្តទាំង ២៥ តំណាងរដ្ឋបាលសាលាខេត្ត និងមន្ត្រីជំនាញពាក់ព័ន្ធសរុបប្រមាណ ៦០រូប។
អង្គភាពត្រួតពិនិត្យ វាយតម្លៃ និងព័ត៌មាននៃលេខាធិការដ្ឋាន គ.ជ.អ.ប បានរៀបចំសិក្ខាសាលានេះក្នុងគោលបំណងពិនិត្យពិភាក្សាលើយន្តការបន្តការអនុវត្តប្រព័ន្ធទិន្នន័យ គ.ជ.អ.ប ឱ្យមាននិរន្តរភាព និងពង្រឹងការអនុវត្តការងារព័ត៌មានវិទ្យាថ្នាក់រាជធានី ខេត្តឱ្យកាន់តែមានប្រសិទ្ធភាព។
ឯកឧត្តម ង៉ាន់ ចំរើន អនុរដ្ឋលេខាធិការក្រសួងមហាផ្ទៃ និងជាអនុប្រធានប្រតិបត្តិនៃលេខាធិការដ្ឋាន គ.ជ.អ.ប បានមាន ប្រសាសន៍បើកសិក្ខាសាលាថា ប្រព័ន្ធទិន្នន័យពិតជាមានសារៈសំខាន់ណាស់ ព្រោះវាបង្កលក្ខណៈងាយស្រួលដល់រដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិក្នុងការត្រួតពិនិត្យតាមដាន និងវាយតម្លៃការអនុវត្តការងារនានារបស់រដ្ឋបាលក្រុង ស្រុក ខណ្ឌ។ ឯកឧត្តម ង៉ាន់ ចំរើន បានមានប្រសាសន៍បញ្ជាក់ថា៖“យើងពិបាកតាមដានការអនុវត្តការងាររបស់រដ្ឋបាលក្រុង ស្រុក ខណ្ឌ ប្រសិនបើយើងពុំមានប្រព័ន្ធទិន្នន័យមួយច្បាស់លាស់”។ បន្ថែមលើសពីនេះ ឯកឧត្តមក៏បានមានប្រសាសន៍ពីបទ ពិសោធន៍ការគ្រប់គ្រងទិន្នន័យតាមបណ្តាប្រទេសមួយចំនួនក្នុងតំបន់អឺរ៉ុបផងដែរ។
ក្នុងឱកាសនេះដែរ ឯកឧត្តមស្នើឯកឧត្តម លោកជំទាវអភិបាលរងទទួលបន្ទុកផែនការអនុវត្ត៣ឆ្នាំ (ផ.អ.៣)ឱ្យពង្រឹងសមត្ថភាព ចំណេះជំនាញមន្ត្រីបង្គោលដែលទទួលបន្ទុកប្រមូល និងបញ្ចូលទិន្នន័យឡើងវិញ ដើម្បីធានាការប្រមូល និងបញ្ចូលទិន្នន័យមានប្រសិទ្ធភាពខ្ពស់។
សូមជម្រាបជូនថា ប្រព័ន្ធទិន្នន័យមិនត្រឹមតែមានតួនាទីរក្សាទុកទិន្នន័យទេ វាថែមទាំងជាកម្មវិធីមួយដែលអាចនាំចេញនូវរបាយការណ៍ផ្សេងៗផងដែរ។ វាជាប្រព័ន្ធ Online ដែលអាចវាយបញ្ចូលទិន្នន័យពីចម្ងាយបាន ដូចជា ខ្ទង់ថវិកា និងតួលេខសូចនាករនៃការបំពេញការងារ។ កន្លងមក រាជធានី ខេត្តនីមួយៗបានអនុវត្តនូវការប្រមូល បញ្ចូលទិន្នន័យ និងប្រើប្រាស់ទិន្នន័យមួយចំនួនរបស់លេខាធិការដ្ឋាន គ.ជ.អ.ប រួមមាន៖ ប្រព័ន្ធទិន្នន័យផែនការថវិកាជាតិ (NAD) ប្រព័ន្ធទិន្នន័យគ្រប់គ្រងសារពើភណ្ឌ (NID ប្រព័ន្ធទិន្នន័យការអនុវត្តគម្រោង (PID) ជាដើម។ គ.ជ.អ.ប មានប្រព័ន្ធទិន្នន័យ Online សរុបចំនួន១៥ រួមមាន៖ ប្រព័ន្ធទិន្នន័យផែនការថវិកាជាតិ (NAD) ប្រព័ន្ធទិន្នន័យគ្រប់គ្រងសារពើភណ្ឌ (NID) ) ប្រព័ន្ធទិន្នន័យគ្រប់គ្រងបណ្ណាល័យ (Lib) ប្រព័ន្ធផ្សព្វផ្សាយព័ត៌មានដេញថ្លៃគម្រោង (Bid) ប្រព័ន្ធទិន្នន័យនៃការអនុវត្តគម្រោង (PID) ប្រព័ន្ធទិន្នន័យតាមដាន និងវាយតម្លៃផ្ទៃក្នុងក្រុង ស្រុក ខណ្ឌ ប្រព័ន្ធត្រួតពិនិត្យតាមដានការអនុវត្តសកម្មភាពគណនេយ្យភាពសង្គម ប្រព័ន្ធទិន្នន័យមូលដ្ឋានឃុំ សង្កាត់ និងប្រព័ន្ធទិន្នន័យគ្រប់គ្រងក្រុមប្រឹក្សា ឃុំ សង្កាត់ ជាដើម។
