ខេត្តក្រចេះ៖ គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) បានរៀបចំវគ្គបណ្តុះបណ្តាលស្តីពី ការណែនាំអនុវត្តគម្រោង (PIM) ជូនដល់មន្ត្រីអនុវត្តគម្រោងនៅក្នុងខេត្តក្រចេះ និងខេត្តត្បូងឃ្មុំ នាថ្ងៃព្រហស្បតិ៍-សុក្រ ១០-១១ រោច ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៤-៥ ខែតុលា ឆ្នាំ២០១៨ នៅសាលមហោស្រពខេត្តក្រចេះ។ វគ្គបណ្តុះបណ្តាលនេះមានការអញ្ជើញចូលរួមពីតំណាងនៃអគ្គនាយកដ្ឋានលំនៅឋាននៃក្រសួងរៀបចំដែនដី នគរូបនីយកម្ម និងសំណង់ លេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) និងអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ព្រមទាំងមានការចូលរួមពីប្រធានគ្រប់គ្រងគម្រោងខេត្តក្រចេះ និងខេត្តត្បូងឃ្មុំ និងមន្ត្រីមកពីមន្ទីរវិស័យពាក់ព័ន្ធនៃខេត្តទាំងពីរ ព្រមទាំងទីប្រឹក្សាជាតិ និងថ្នាក់ក្រោមជាតិសរុបប្រមាណជាង៧០រូប។
គោលបំណងសំខាន់ៗនៃវគ្គបណ្តុះបណ្តាលស្តីពី ការណែនាំអនុវត្តគម្រោង (PIM) គឺដើម្បីបង្កើនការយល់ដឹង និងប្រសិទ្ធភាពក្នុងការអនុវត្តគម្រោងរបស់ក្រុមការងារថ្នាក់ក្រោមជាតិ ក្នុងខេត្តគោលដៅទាំង៥ ឱ្យបានយល់ដឹងកាន់តែច្បាស់អំពី៖
(១) គោលការណ៍សំខាន់ៗក្នុងសៀវភៅអនុវត្តគម្រោង
(២) នីតិវិធីសំខាន់ៗតាមជំនាញ និងផ្នែកនីមួយៗ
(៣) រចនាសម្ព័ន្ធគ្រប់គ្រង និងការទទួលខុសត្រូវក្នុងការអនុវត្តគម្រោង
នៅក្នុងវគ្គបណ្តុះនេះ ក្រុមការងារថ្នាក់ជាតិបានធ្វើបទបង្ហាញដល់ក្រុមការងារអនុវត្តគម្រោងនៅថ្នាក់ខេត្ត ដោយផ្សាភ្ជាប់រវាងទ្រឹស្តី និងគោលការណ៍ណែនាំក្នុងសៀវភៅស្តីពីការអនុវត្តគម្រោង ជាមួយនឹងការអនុវត្តជាក់ស្តែងកន្លងមក ដោយផ្តោតបន្ថែមទៅលើបច្ចេកទេសសំខាន់ៗតាមផ្នែកនីមួយៗ ដើម្បីបង្កើនការយល់ដឹងលើជំនាញរបស់ខ្លួន។ លើសពីនេះ វគ្គបណ្តុះបណ្តាលក៏បានបែងចែកក្រុមពិភាក្សា ដើម្បីសែ្វងរកចំណុចល្អ និងចំណុចដែលត្រូវកែសម្រួល ឬសំណូមពរកែសម្រួលផ្នែកណាមួយនៅក្នុងសៀវភៅណែនាំអនុវត្តគម្រោង ដើម្បីងាយស្រួលក្នុងការអនុវត្តបន្តទៀត៕
សូមបញ្ជាក់ថា បន្ទាប់ពីគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) ត្រូវបានចាប់ផ្តើមអនុវត្តកាលពីខែសីហា ឆ្នាំ ២០១៦។ ក្រុមការងារអនុវត្តគម្រោងនៅថ្នាក់ជាតិ និងថ្នាក់ក្រោមជាតិបានចាប់ផ្តើម និងអនុវត្តសកម្មភាពទៅតាមគោលបំណងអភិវឌ្ឍន៍គម្រោង (PDO) និងសូចនាករដូចមានក្នុងសៀវភៅណែនាំអនុវត្តគម្រោង គោលការណ៍ណែនាំ និងកិច្ចព្រមព្រៀងហិរញ្ញប្បទាន ហើយដើម្បីបង្កើនប្រសិទ្ធភាពនៃការអនុវត្ត គម្រោង LASED II បានលើកផែនការសកម្មភាពក្នុងឆ្នាំ២០១៨ ដើម្បីផ្តល់ការបណ្តុះបណ្តាលស្តីពីណែនាំអនុវត្ត “តាមសៀវភៅណែនាំ ស្តីពីការអនុវត្តគម្រោង (PIM)” ដល់ក្រុមការងារថ្នាក់ក្រោមជាតិទាំង ៥ ខេត្ត ដោយក្នុងនោះក្រុមការងារអនុវត្តគម្រោងខេត្តកំពង់ធំបានទទួលបណ្តុះបណ្តាលនេះកាលពីថ្ងៃទី២០-២១ ខែកញ្ញា ឆ្នាំ២០១៨ ហើយខេត្តត្បូងឃ្មុំ និងខេត្តក្រចេះបានទទួលការបណ្តុះបណ្តាលនៅពេលនេះ រីឯខេត្តកំពង់ស្ពី និងខេត្តកំពង់ឆ្នាំង នឹងទទួលបានវគ្គបណ្តុះបណ្តាលនាពេលខាងមុខ៕