ខេត្តកំពង់ឆ្នាំ៖ នៅថ្ងៃពុធ ៨កើត ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ ខែមិថុនា ឆ្នាំ២០១៨ គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) បានរៀបចំដំណើរទស្សនកិច្ចសិក្សារបស់អ្នកសារព័ត៌មានជាតិសំខាន់ៗនៅក្នុងប្រទេសកម្ពុជាទៅកាន់ទីតាំងដីសម្បទានសង្គមកិច្ចនៅក្នុងភូមិសុខសែនជ័យ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង ដើម្បី (១) បង្កើនការយល់ដឹងដល់អ្នកសារព័ត៌មានអំពីគោលបំណង និងវឌ្ឍនភាពនៃគម្រោង LASED II (២) ផ្សព្វផ្សាយពីលទ្ធផលគម្រោង និងភាពរីកចម្រើនរបស់អ្នកទទួលដីសម្បទាន និង (៣) បង្កើតការគាំទ្រពីសាធារណៈជន និងអ្នកពាក់ព័ន្ធដល់ដំណើរការអនុវត្តគម្រោង តាមរយៈការផ្សព្វផ្សាយរបស់បណ្តាញសារព័ត៌មាន។
នៅក្នុងដំណើរទស្សនកិច្ចសិក្សានៅថ្ងៃទីមួយនេះ នៅសាលប្រជុំសាលាខេត្តកំពង់ឆ្នាំង ក្រុមការងារគម្រោង LASED II ថ្នាក់ជាតិ និងខេត្តកំពង់ឆ្នាំបានធ្វើបទបង្ហាញអំពីវឌ្ឍនភាពរបស់គម្រោង LASED II ទាំងមូល និងអំពីវឌ្ឍនភាពរបស់គម្រោង LASED II នៅខេត្តកំពង់ឆ្នាំង ដល់អ្នកសារព័ត៌មានដើម្បីឱ្យអ្នកសារព័ត៌មានបានយល់ដឹងពីសាវតា វឌ្ឍនភាព និងការខិតខំប្រឹងប្រែងរបស់គម្រោងក្នុងការបន្តជួយអភិវឌ្ឍជីវភាពរស់នៅរបស់អ្នកទទួលផលដែលបានទទួលដីលំនៅឋាន និងដីកសិកម្មពីគម្រោង LASED II។ ក្រៅពីការស្តាប់បទបង្ហាញ អ្នកសារព័ត៌មានក៏បានសួរសំណួរ ថតរូប និងថតវីដេអូទៅកាន់មន្ត្រីអនុវត្តគម្រោង ដើម្បីស្វែងយល់បន្ថែមទៀតអំពីការអនុវត្តគម្រោង ក៏ដូចជាការរីកចម្រើនរបស់សម្បទានិកដែលទទួលបានដីប្រើប្រាស់ និងដើម្បីចងក្រងព័ត៌មានសម្រាប់ផ្សព្វផ្សាយនៅពេលចប់ដំណើរទស្សនកិច្ចសិក្សានេះផងដែរ។
គួរបញ្ជាក់ថា ដំណើរទស្សនកិច្ចសិក្សានេះប្រព្រឹត្តិទៅរយៈពេលពីរថ្ងៃ គឺថ្ងៃទី២០-២១ ខែមិថុនា ឆ្នាំ២០១៨។ នៅថ្ងៃទី២១ ខែមិថុនា ឆ្នាំ២០១៨ ក្រុមអ្នកសារព័ត៌មាន និងក្រុមការងារអនុវត្តគម្រោងនឹងបន្តដំណើរទៅកាន់ទីតាំងដីសម្បទានសង្គមកិច្ចរបស់គម្រោង LASED II ដែលស្ថិតនៅក្នុងភូមិសុខសែនជ័យ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង។ នៅទីនោះ ក្រុមអ្នកសារព័ត៌មាននឹងបានជួបជាមួយអ្នកទទួលផល និងអាជ្ញាធរពាក់ព័ន្ធ ដើម្បីធ្វើបទសម្ភាសន៍ ថតរូប និងថតវីដេអូអំពីការរស់នៅ និងជីវភាពប្រចាំថ្ងៃរបស់អ្នកទទួលផលទាំងនោះ។
ការរៀបចំដំណើរទស្សនកិច្ចសិក្សានេះ គឺជាផ្នែកមួយនៃការផ្សព្វផ្សាយព័ត៌មាន និងទំនាក់ទំនងរបស់គម្រោង LASED II ដែលដើរតួនាទីយ៉ាងសំខាន់ក្នុងការផ្សព្វផ្សាយ លើកកម្ពស់ការយល់ដឹង និងចែករំលែកព័ត៌មានដល់ក្រុមការងារអនុវត្តគម្រោង អ្នកទទួលផល និងអ្នកពាក់ព័ន្ធនានា។ សូមរង់ចាំអានអត្ថបទបន្ទាប់!
