គម្រោង LASED II ខេត្តកំពង់ធំប្រគល់សម្ភារៈគាំទ្រការចូលតាំងទីលំនៅជូនសម្បទានិកនៅឃុំដូង

គួរបញ្ជាក់ថា នេះជាការចែកជូននូវសម្ភារៈគាំទ្រដល់កិច្ចដំណើរការចូលតាំងទីលំនៅរបស់សម្បទានិករបស់គម្រោង LASED II បន្ទាប់ពីគម្រោងបានចែកជូននូវសម្ភារៈកសិកម្ម គ្រាប់ពូជបន្លែ និងកូនឈើហូបផ្លែនាពេលកន្លងមក។

តាមផែនការ នាពេលខាងមុខ គម្រោងនឹងបន្តចែកជូននូវសម្ភារៈមួយចំនួនទៀតដូចជា អំពូលពន្លឺព្រះអាទិត្យ តង់ផ្លាស្ទិក កន្ទេល ភួយ ធុងទឹក ធុងចម្រោះទឹក ដើម្បីបន្តគាំទ្រដល់សម្បទានិកក្នុងការចូលទៅតាំងទីលំនៅដំបូង។ លើសពីនេះ គម្រោងក៏នឹងបន្តអភិវឌ្ឍហេដ្ឋារចនាសម្ព័ន្ធរួមមាន ផ្លូវថ្នល់ សាលារៀន ប៉ុសិ៍សុខភាព អគារសហគមន៍ ផ្សារសហគមន៍ អគារស្នាក់នៅសម្រាប់គ្រូបង្រៀន អណ្តូងទឹក ស្រះទឹក ប្រព័ន្ធស្រោចស្រព ។ល។ និងផ្តល់នូវបច្ចេកទេសធ្វើកសិកម្ម ចិញ្ចឹមសត្វ និងការកែច្នៃផលិតផលកសិកម្ម ដើម្បីឱ្យសម្បទានិកមានមុខរបរ និងបន្តលើកស្ទួយជីវភាពរបស់ខ្លួន។ ទន្ទឹមនឹងនោះ គម្រោងក៏នឹងផ្តល់ទុនបង្វិលប្រមាណជា ២៨០$ ជូនសម្បទានិកក្នុងមួយគ្រួសារ ដើម្បីចាប់ផ្តើមបង្កបង្កើនផល ឬបង្កើតមុខរបររបស់ខ្លួន។

ជារួម រាជរដ្ឋាភិបាលគ្រោងនឹងចំណាយទឹកប្រាក់ប្រមាណជា៤លានដុល្លារអាមេរិក សម្រាប់ការអភិវឌ្ឍជូនបងប្អូនប្រជាពលរដ្ឋនៅលើដីសម្បទានសង្គមកិច្ចនេះ ដើម្បីប្រែក្លាយពីគ្រួសារដែលគ្មានដី និងខ្វះខាតដីទាំងនោះ ទៅជាគ្រួសារដែលមានដីលំនៅដ្ឋាន និងមានដីសម្រាប់ផលិតកម្មកសិកម្មប្រកបដោយភាពបៃតង និងពីគ្រួសារក្រីក្រ ទៅជាគ្រួសារដែលមានជីវភាពធូរធារប្រកបដោយសុភមង្គល និងក្តីសង្ឃឹមទៅអនាគត។