ខេត្តព្រៃវែង៖ នៅពីថ្ងៃទី ០៨-០៩ ខែឧសភា ឆ្នាំ២០១៨ ឯកឧត្តម ងី ច័ន្រ្ទផល រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការគ្រប់គ្រងការអនុវត្តផែនការយុទ្ធសាស្រ្តគណនេយ្យភាពសង្គម (គ.គ.អ.ស) បានដឹកនាំសមាជិក សមាជិកា ប្រតិភូទីភ្នាក់ងារសហប្រតិបត្តិការសម្រាប់កិច្ចអភិវឌ្ឍន៍របស់ប្រទេសស្វីស (SDC) និងដៃគូអភិវឌ្ឍន៍នានា ចុះសិក្សាស្វែងយល់រៀនសូត្រពីដំណើរការអនុវត្តការងារគណនេយ្យភាពសង្គមទាំងផ្នែកផ្គត់ផ្គង់ និងផ្នែកតម្រូវការដែលបាននឹងកំពុងអនុវត្តជាក់ស្តែងនៅមូលដ្ឋាន និងផ្តល់អនុសាសន៍ជាគន្លឹះដើម្បីធ្វើឱ្យការអនុវត្តការងារកាន់តែប្រសើរឡើង។
ជាក់ស្តែងមានស្រុកគោលដៅចំនួន៩៨ នៃខេត្តចំនួន១៨ផ្តោតលើការផ្តល់សេវារដ្ឋបាលឃុំចំនួន៨២៧ មណ្ឌលសុខភាពចំនួន៦០៥ និងសាលាបឋមសិក្សាចំនួន៤.១០៨ ក្នុងការផ្តល់នូវព័ត៌មានអំពីសិទ្ធិ ស្តង់ដារការងារ ថវិកា ការបំពេញការងារ និងព័ត៌មាននានាដល់ប្រជាពលរដ្ឋនៅមូលដ្ឋាន។
នៅរសៀលថ្ងៃទី០៨ ខែឧសភា ឆ្នាំ២០១៨ គណៈប្រតិភូ បានជួបប្រជុំពិភាក្សានៅថ្នាក់ខេត្ត។ ក្នុងកិច្ចប្រជុំពិភាក្សានេះ ឯកឧត្តម ឌុច គន្ធា អភិបាលរងខេត្តព្រៃវែង ដែលជាតំណាងរបស់ឯកឧត្តមអភិបាលខេត្ត បានមានមតិស្វាគមន៍ និងថ្លែងអំណរគុណចំពោះវត្តមានរបស់គណៈប្រតិភូ ឯកឧត្តម លោកជំទាវ លោក លោកស្រីដែលមានវត្តមានក្នុងដំណើរទស្សនកិច្ចសិក្សាស្វែងយល់ពីការអនុវត្តការងារគណនេយ្យភាពសង្គមនៅខេត្តព្រៃវែង។ តការងារគណនេយ្យភាពសង្គមនៅក្នុងខេត្តព្រៃវែង។ក្នុងនោះផងដែរមន្រ្តីបង្គោលគណនេយ្យភាពសង្គមខេត្តបានធ្វើបទបង្ហាញជូនគណៈប្រតិភូ ដើម្បីស្វែងយល់ពីសាវតារ សមិទ្ធផលសម្រេចបាន បញ្ហាប្រឈម និងផែនការសកម្មភាព និងថវិកាឆ្នាំ២០១៨ នៃការអនុវត្តការងារគណនេយ្យភាពសង្គមនៅក្នុងខេត្តព្រៃវែង។ ស្របពេលជាមួយគ្នានេះដែរក៏មានការលើកជាសំណួរមួយចំនួន ពីសំណាក់ទីភ្នាក់ងារសហប្រតិបត្តិការសម្រាប់កិច្ចអភិវឌ្ឍន៍របស់ប្រទេសស្វីស និងធនាគារពិភពលោកផងដែរ។
បន្ទាប់ពីកិច្ចប្រជុំពិភាក្សានេះ គណៈប្រតិភូ ថ្នាក់ដឹកនាំរដ្ឋបាលខេត្ត មន្រ្តីរដ្ឋបាលខេត្ត ដៃគូអភិវឌ្ឍន៍នានា អង្គការសង្គមស៊ីវិល និងអ្នកពាក់ព័ន្ធបានអញ្ជើញទៅពិនិត្យការបិទផ្សព្វផ្សាយកញ្ចប់ព័ត៌មានសម្រាប់ប្រជាពលរដ្ឋនៅអង្គភាពផ្តល់សេវាទាំងបី (រដ្ឋបាលឃុំ សាលាបឋមសិក្សា និងមណ្ឌលសុខភាព) ដែលស្ថិតក្នុងដែនរដ្ឋបាលឃុំបាបោង ស្រុកពាមរក៍ ខេត្តព្រៃវែង និងជួបជាមួយបុគ្គលិកអង្គភាពផ្តល់សេវាទាំងបី។
ព្រឹកថ្ងៃទី០៩ ខែឧសភា ឆ្នាំ២០១៨ កម្មវិធីទស្សនកិច្ចសិក្សានេះ បានជួបប្រជុំពិភាក្សាជាមួយរដ្ឋបាលស្រុកពាមរក៍ ដោយមានមតិស្វាគមន៍ដោយ លោកស្រីអភិបាល នៃគណៈអភិបាលស្រុកពាមរក៍ និងមានបទបង្ហាញពីវឌ្ឍនភាព បញ្ហាប្រឈម និងផែនការសកម្មភាព និងថវិការបស់រដ្ឋបាលស្រុក ដើម្បីអនុវត្តការងារគណនេយ្យភាពសង្គម។
បន្ទាប់ពីការប្រជុំពិភាក្សានេះចប់ គណៈប្រតិភូ ដៃគូអភិវឌ្ឍន៍នានា និងអ្នកពាក់ព័ន្ធអញ្ជើញចុះទៅសាលាបឋមសិក្សាបន្លិចប្រាសាទ នៃឃុំបន្លិចប្រាសាទ ស្រុកពាមរក៍ ដើម្បីធ្វើការសិក្សាស្វែងយល់ជាក់ស្តែងពីកិច្ចប្រជុំរួមនៅមូលដ្ឋានរវាងអង្គភាពផ្តល់សេវាទាំងបី និងតំណាងប្រជាពលរដ្ឋ ដើម្បីលើកឡើងនូវមតិយោបល់ បញ្ហាប្រឈម ទាក់ទងនឹងការផ្តល់សេវា និងចាត់សកម្មភាពអាទិភាពសម្រាប់កសាងផែនការសកម្មភាពរួមស្តីពីការងារគណនេយ្យភាពសង្គម (JAAP)។
រសៀលថ្ងៃទី០៩ ខែឧសភា ឆ្នាំ២០១៨ គណៈប្រតិភូ និងអ្នកពាក់ព័ន្ធ បានជួបពិភាក្សាជាមួយគណៈកម្មាធិការផែនការសកម្មភាពរួមស្តីពីការងារគណនេយ្យភាពសង្គម (JAAPC) នៃឃុំបន្លិចប្រាសាទ ដើម្បីស្វែងយល់ពីសកម្មភាពប្រជុំរបស់ JAAPC សកម្មភាពអាទិភាពនៃ JAAP ដែលបានអនុវត្ត និងមិនបានអនុវត្តកាលពីឆ្នាំ២០១៧ និងបញ្ហាប្រឈមនៃការអនុវត្ត JAAP។ ក្រោយពេលបញ្ចប់ការជួបពិភាក្សាជាមួយ JAAPC រួចមកគណៈប្រតិភូ និងអ្នកពាក់ព័ន្ធបានអញ្ជើញទៅជួបសំណេះសំណាលជាមួយប្រជាពលរដ្ឋ និងក្លឹបកុមារសហគមន៍ដែលជាអ្នកទទួលផលពីការអនុវត្តការងារគណនេយ្យភាពសង្គម ដើម្បីស្វែងយល់ពីអត្ថប្រយោជន៍នៃការអនុវត្តការងារគណនេយ្យភាពសង្គម។
ការអនុវត្តការងារគណនេយ្យភាពសង្គមក្នុងរដ្ឋបាលខេត្តព្រៃវែង នឹងបង្កើនគុណភាព ប្រសិទ្ធភាពបន្ថែមទៀត ក្នុងការលើកកម្ពស់ការផ្តល់សេវាជូនប្រជាពលរដ្ឋនៅមូលដ្ឋាន និងបង្កើនទំនាក់ទំនងយ៉ាងជិតស្និទរវាងអ្នកផ្តល់សេវា និងប្រជាពលរដ្ឋដើម្បីផ្លាស់ប្តូរនូវឥរិយាបថអវិជ្ជមាននានា។ ចំពោះប្រជាពលរដ្ឋវិញ ទទួលបានព័ត៌មានពីសិទ្ធិ ស្តង់ដារបំពេញការងារ ដើម្បីចូលរួមយ៉ាងសកម្មក្នុងពិនិត្យ តាមដាន ចាត់ចែងនូវថវិការបស់រដ្ឋបាលឃុំ សាលាបឋមសិក្សា និងមណ្ឌលសុខភាព ក្នុងការអភិវឌ្ឍសហគមន៍មូលដ្ឋានរបស់ខ្លួន៕