រាជធានីភ្នំពេញ៖ សិក្ខាសាលាផ្សព្វផ្សាយ ស្តីពី «ការអនុវត្តការងារគណនេយ្យភាពសង្គម» ត្រូវបានរៀបចំឡើងដោយក្រសួងអប់រំ យុវជន និងកីឡា សហការជាមួយលេខាធិការដ្ឋាន គ.ជ.អ.ប ក្រោមអធិបតីភាព ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា ក្នុងគោលបំណងបង្កើនការយល់ដឹងអំពីផែនការយុទ្ធសាស្រ្ត ស្តីពីការងារគណនេយ្យភាពសង្គមសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ និងផ្សព្វផ្សាយអំពីលទ្ធផលការងាររបស់អង្គភាពផ្តល់សេវាក្នុងវិស័យអប់រំនៅតាមសាលាបឋមសិក្សា ពិសេសចូលរួមក្នុងដំណើរការកំណែទម្រង់វិស័យអប់រំតាមរយៈកំណែទម្រង់វិមជ្ឈការ និងវិសហមជ្ឈការ ដែលបានប្រព្រឹត្តទៅនៅសាលប្រជុំអគាររដ្ឋបាលក្រសួងអប់រំ យុវជន និងកីឡា កាលពីថ្ងៃទី៣០ ខែឧសភា ឆ្នាំ២០១៨។
ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ផ្តោតសំខាន់ទៅលើវិសាលភាពនៃការអនុវត្ត ដោយគួរពិចារណាពង្រីកឲ្យបានគ្រប់ ២៥ខេត្ត រាជធានី និងអនុវត្តតាមបែបគ្រប់គ្រងសលាស្តង់ដារ (School Best Management) ពោលគឺឈរលើគោលការណ៍បីរួមមាន៖ ស្វ័យភាព គណនេយ្យភាព និងលទ្ធផលសិក្សារបស់សិស្សល្អ។
បន្ទាប់ពីប្រសាសន៍បើកសិក្ខាសាលារួច ឯកឧត្តម ជាម ប៉េអា អគ្គនាយករងនៃអគ្គនាយកដ្ឋានរដ្ឋបាល ក្រសួងមហាផ្ទៃ និងជាប្រធានអង្គភាពត្រួតពិនិត្យ វាយតម្លៃ និងព័ត៌មាននៃលេខាធិការដ្ឋាន គ.ជ.អ.ប បានធ្វើបទបង្ហាញអំពី កំណែទម្រង់វិមជ្ឈការ និងវិសហមជ្ឈការ ក្រោមប្រធានបទសំខាន់ៗដូចជា៖ សាវតាកំណែទម្រង់វិមជ្ឈការ និងវិសហមជ្ឈការ សមិទ្ធផលកម្មវិធីកំណែទម្រង់វិមជ្ឈការ និងវិសហមជ្ឈការ ការងារគណនេយ្យភាពសង្គម និងពិភាក្សាអំពីសូចនាករសំខាន់ៗក្នុងទម្រង់ស្រង់ទិន្នន័យ។
កំណែទម្រង់វិមជ្ឈការ និងវិសហមជ្ឈការ គឺជាសមាសធាតុដ៏សំខាន់នៃកំណែទម្រង់រដ្ឋបាលសាធារណៈ ដែលផ្តោតលើការរៀបចំឡើងវិញនូវរចនាសម្ព័ន្ធ ប្រព័ន្ធគ្រប់គ្រងរដ្ឋបាលនៅរដ្ឋបាលថ្នាក់ក្រោមជាតិ តាមគោលការណ៍រដ្ឋបាលឯកភាព និងការអភិវឌ្ឍតាមបែបប្រជាធិបតេយ្យ។ សាវតានៃកំណែទម្រង់មានដូចតទៅ៖
- ឆ្នាំ២០០១ ច្បាប់ស្តីការគ្រប់គ្រងរដ្ឋបាលឃុំ សង្កាត់ និងច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់
- ឆ្នាំ២០០២ ការផ្លាស់ប្តូរជាប្រវត្តិសាស្ត្រប្រព័ន្ធគ្រប់គ្រងរដ្ឋបាលឃុំ សង្កាត់
- ឆ្នាំ២០០៥ ក្របខ័ណ្ឌយុទ្ធសាស្ត្រកំណែទម្រង់វិមជ្ឈការ និងវិសហមជ្ឈការ
- ឆ្នាំ២០០៨ វិសោធនកម្មរដ្ឋធម្មនុញ្ញ និងការបង្កើតច្បាប់រៀបចំអង្គការ
- ឆ្នាំ២០០៩ ការបោះឆ្នោតក្រុមប្រឹក្សារាជធានី ខេត្តក្រុង ស្រុក ខណ្ឌ និងរៀបចំរចនាសម្ព័ន្ធ និងប្រព័ន្ធគ្រប់គ្រងឡើងវិញ
- ឆ្នាំ២០១០ កម្មវិធីជាតិរយៈពេល១០ឆ្នាំត្រូវបានបង្កើតឡើង ដើម្បីធ្វើផែនទីបង្ហាញផ្លូវសម្រាប់សម្រាប់ការអនុវត្តកំណែទម្រង់វិមជ្ឈការដោយផ្តោតលើសមាសធាតុសំខាន់ៗចំនួនប្រាំ៖ (១)ការគ្រប់គ្រងកិច្ចដំណើរការកំណែទម្រង់ (២)ការលើកកម្ពស់គណនេយ្យភាពតាមបែបប្រជាធិបតេយ្យ (៣)ការគ្រប់គ្រង និងការអភិវឌ្ឍធនធានមនុស្ស (៤)ការផ្តល់សេវា និងមុខងាររបស់រដ្ឋបាលថ្នាក់ក្រោមជាតិ និង(៥)វិមជ្ឈការហិរញ្ញវត្ថុ។
ការងារគណនេយ្យភាពសង្គមជាលទ្ធផលរំពឹងទុកមួយនៃសមិទ្ធផលអភិបាលកិច្ចល្អរបស់កម្មវិធីជាតិ។ គណនេយ្យភាពសង្គម គឺជាដំណើរការនៃការផ្សារភ្ជាប់រវាងប្រជាពលរដ្ឋ និងក្រុមប្រឹក្សារដ្ឋបាលថ្នាក់ក្រោមជាតិដែលផ្តល់ឱកាសដល់ប្រជាពលរដ្ឋឱ្យមានភាពងាយស្រួលក្នុងការទទួលបានព័ត៌មាន និងចូលរួមផ្តល់យោបល់ដល់ការបំពេញការងាររបស់ក្រុមប្រឹក្សា និងអង្គភាពផ្តល់សេវានានានៅមូលដ្ឋាន។ គោលបំណងនៃការអនុវត្តការងារគណនេយ្យភាពសង្គម គឺដើម្បីផ្តល់សិទ្ធិអំណាចដល់ប្រជាពលរដ្ឋចូលរួមពង្រឹងការចាត់ចែងការប្រើប្រាស់ថវិកា និងលើកកម្ពស់ការបំពេញការងាររបស់រដ្ឋបាលថ្នាក់ក្រោមជាតិ។
គិតមកត្រឹមដំណាច់ឆ្នាំ២០១៧ មុខងារសរុបចំនួន១៤ ដែលត្រូវបានប្រគល់ និងធ្វើប្រតិភូកម្មទៅឱ្យរដ្ឋបាលថ្នាក់ក្រោមជាតិដែលក្នុងនោះមានវិស័យអប់រំផងដែរ។ មុខងារទាំងនោះមានចំនួន ៤ ដែលក្រសួងអប់រំបានប្រគល់រួមមាន៖ ការអប់រំកុមារតូច ការអប់រំបឋមសិក្សា ការអប់រំក្រៅប្រព័ន្ធ និងការគ្រប់គ្រងមត្តេយ្យសិក្សាសហគមន៍៕
