ឯកឧត្តម ជាម ប៉េអា អគ្គនាយករងរដ្ឋបាលក្រសួងមហាផ្ទៃ និងជាប្រធានអង្គភាពត្រួតពិនិត្យ វាយតម្លៃ និងព័ត៌មាននៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានចូលរួមជាវាគ្មិននៅក្នុងកម្មវិធីវិទ្យុក្រោមប្រធានបទ “តើអ្វីជាការអនុវត្តការងារគណនេយ្យភាពសង្គម?” ដែលបានប្រព្រឹត្តិទៅកាលពីថ្ងៃទី៧ ខែមិថុនា ឆ្នាំ២០១៨ នៅស្ថានីយ៍វិទ្យុបាយ័ន។
នៅក្នុងកិច្ចពិភាក្សាផ្សាយផ្ទាល់នោះ ឯកឧត្តម ជាម ប៉េអា បានជម្រាបជូនប្រិយមិត្តអ្នកស្តាប់កម្មវិធីវិទ្យុថា “គណនេយ្យភាពសង្គម គឺជាដំណើរការផ្សារភ្ជាប់រវាងរដ្ឋបាលថ្នាក់ក្រោមជាតិ និងប្រជាពលរដ្ឋ សំដៅគាំទ្រ ដល់ការលើកកម្ពស់ការផ្តល់សេវាសាធារណៈ និងការបំពេញការងាររបស់អ្នកផ្តល់សេវាឱ្យកាន់តែមានគុណភាព និងមានប្រសិទ្ធភាពខ្ពស់”។ ឯកឧត្តមបានមានប្រសាសន៍បន្ថែមថា ការអនុវត្តគណនេយ្យភាពសង្គមបាននឹងកំពុងផ្តល់ផលប្រយោជន៍ជាច្រើនដូចជា៖
- ធ្វើឱ្យមានការផ្លាស់ប្តូរ ឬការឆ្លើយតបរបស់រដ្ឋបាលថ្នាក់ក្រោមជាតិចំពោះប្រជាពលរដ្ឋ
- លើកកម្ពស់សមត្ថភាពរបស់ប្រជាពលរដ្ឋ និងតំណាងរបស់ប្រជាឱ្យចូលរួមផ្តល់យោបល់ដល់រដ្ឋបាលថ្នាក់ក្រោមជាតិក្នុងការលើកកម្ពស់គណនេយ្យភាពតាមបែបប្រជាធិបតេយ្យ
- ធ្វើឱ្យការផ្ដល់សេវា និងការបែងចែកធនធានរបស់រដ្ឋបាលថ្នាក់ក្រោមជាតិកាន់តែមានប្រសិទ្ធភាព តម្លាភាព គណនេយ្យភាព និងសមធម៌
- លើកកម្ពស់សិទ្ធិអំណាចប្រជាពលរដ្ឋ តាមរយៈការបង្កលក្ខណៈឱ្យពួកគាត់មានការយល់ដឹង កាន់តែច្រើនឡើងអំពីសិទ្ធ និងការទទួលខុសត្រូវ របស់ខ្លួនក្នុងការប្រាស្រ័យទាក់ទងជាមួយរដ្ឋបាលថ្នាក់ក្រោមជាតិ និង
- កែលម្អសេវា និងបង្កើនមូលធនសង្គម។
ឯកឧត្តមក៏បានបញ្ជាក់ថែមទៀតថា ការអនុវត្តគណនេយ្យភាពសង្គមត្រូវបានអនុវត្តជា២ផ្នែកគឺផ្នែកផ្គត់ផ្គង់ដែលអនុវត្តដោយរដ្ឋបាលថ្នាក់ក្រោមជាតិ និងផ្នែកតម្រូវការដែលអនុវត្តដោយប្រជាពលរដ្ឋតាមរយៈអង្គការសង្គមស៊ីវិល ក្នុងគោលបំណងធ្វើឱ្យមានតម្លាភាព គណនេយ្យភាព ប្រសិទ្ធភាព មានការចូលរួម និងមានការឆ្លើយតបទាន់ពេលវេលាទៅនឹងតម្រូវការរបស់ប្រជាពលរដ្ឋ។
ក្រៅពីការជម្រាបជូននូវព័ត៌មានសំខាន់មួយចំនួនខាងលើ ឯកឧត្តមក៏បានឆ្លើយតបចំពោះសំណួរមួយចំនួនរបស់ប្រិយមិត្តអ្នកស្តាប់ដែលបានទូរស័ព្ទសួរសំណួរក្នុងកម្មវិធីនោះផងដែរ។
ឯកសារពាក់ព័ន្ធ