ខេត្តកំពង់ចាម៖ ប្រធានអង្គភាពត្រួតពិនិត្យ វាយតម្លៃ និងព័ត៌មាននៃលេខាធិការគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ឯកឧត្តម ជាម ប៉េអា បានជំរុញឱ្យរដ្ឋបាលថ្នាក់ក្រោមជាតិយកចិត្តទុកលើការគ្រប់គ្រងប្រព័ន្ធទិន្នន័យ និងការផ្សព្វផ្សាយព័ត៌មានទៅក្នុងគេហទំព័រ និងបណ្តាញផ្សព្វផ្សាយសង្គម ដើម្បីពង្រឹងការត្រួតពិនិត្យ វាយតម្លៃការងារ និងការផ្សព្វផ្សាយចែករំលែកព័ត៌មានសកម្មភាពការងាររបស់រដ្ឋបាលថ្នាក់ក្រោមជាតិដល់សាធារណជនឱ្យទូលំទូលាយ និងមាននិរន្តរភាព។
ថ្លែងបើកសិក្ខាសាលាស្តីពី ការបណ្តុះបណ្តាលមន្ត្រីព័ត៌មានវិទ្យាថ្មីថ្នាក់រាជធានី ខេត្ត នៅថ្ងៃអង្គារ ២រោច ខែស្រាពណ៍ ឆ្នាំច សំរឹទ្ធស័ក ព.ស. ២៥៦២ ត្រូវនឹងថ្ងៃទី២៨ ខែសីហា ឆ្នាំ២០១៨នេះ ឯកឧត្តម ជាម ប៉េអា បានក្រើនរម្លឹកដល់មន្ត្រីព័ត៌មានវិទ្យាថ្នាក់ក្រោមជាតិចំនួន ៦៥រូបដែលមានវត្តមានក្នុងវគ្គបណ្តុះបណ្តាលពីសារៈប្រយោជន៍នៃការគ្រប់គ្រងប្រព័ន្ធទិន្នន័យ (Database System)ថា ការគ្រប់គ្រង និងបញ្ជូនទិន្នន័យបានត្រឹមត្រូវទាន់ពេលវេលាពិតជាមានសារៈសំខាន់ណាស់ ពីព្រោះវាជួយឱ្យរដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិអាចចែករំលែកព័ត៌មានស្តីពី ការត្រួតពិនិត្យ និងវាយតម្លៃរាល់ផែនការសកម្មភាព ថវិកា និងព័ត៌មាននានាបានឆាប់រហ័សជាប្រចាំ។
ថ្លែងបើកវគ្គបណ្តុះបណ្តាលដែលរៀបចំឡើងក្នុងសាលប្រជុំនៃសាកលវិទ្យាល័យគ្រប់គ្រង និងសេដ្ឋកិច្ច សាខាខេត្តកំពង់ចាម ឯកឧត្តមប្រធានអង្គភាពត្រួតពិនិត្យ វាយតម្លៃ និងព័ត៌មានបានមានប្រសាសន៍បន្ថែមថា ការគ្រប់គ្រងប្រព័ន្ធទិន្នន័យច្បាស់លាស់ជួយឱ្យរដ្ឋបាលថ្នាក់ក្រោមជាតិងាយស្រួលធ្វើរបាយការណ៍បូកសរុបផែនការសកម្មភាព និងថវិកាដោយគ្រាន់តែធ្វើការទាញទិន្នន័យដែលបានបញ្ចូលចេញពីប្រព័ន្ធអនឡាញ (Online) ជាការស្រេច។ ជាងនេះទៀត ឯកឧត្តមបានបញ្ជាក់ថា ប្រព័ន្ធទិន្នន័យនេះតួនាទីយ៉ាងសំខាន់ក្នុងការផ្តល់ព័ត៌មានសកម្មភាពការងារ ចំណេះដឹង និងការអនុវត្តគម្រោងនានារបស់រដ្ឋបាលថ្នាក់ក្រោមជាតិទៅកាន់សាធារណជនយ៉ាងទូលំទូលាយ ឆ្លើយតបនឹងគោលនយោបាយលើកកម្ពស់ការអភិវឌ្ឍតាមប្រជាធិបតេយ្យនៅថ្នាក់ក្រោមជាតិរបស់រាជរដ្ឋាភិបាល។ ឯកឧត្តម ជាម ប៉េអា មានប្រសាសន៍បញ្ជាក់យ៉ាងដូច្នេះ៖“ការគ្រប់គ្រងប្រព័ន្ធទិន្នន័យនេះ គឺជាការរួមចំណែកក្នុងការងារកំណែទម្រង់វិមជ្ឈការ និងវិសហមជ្ឈការដែលជាឆន្ទៈរបស់រាជរដ្ឋាភិបាល ដើម្បីការផ្តល់សេវាជូនសាធារណជនឱ្យមានតម្លាភាព សុចរិតភាព ឆ្លើយតបទាន់ពេលវេលា ការចូលរួម ភាពជាតំណាង ទប់ស្កាត់ភាពអសកម្ម និងអំពើពុករលួយ”។
ជាចុងបញ្ចប់ ឯកឧត្តមសង្ឃឹមថា រដ្ឋបាលថ្នាក់ក្រោមជាតិនឹងបង្កើនការផលិតចែកចាយព័ត៌មានជូនប្រជាពលរដ្ឋ និងខិតខំស្វែងយល់ ចែករំលែកបទពិសោធ ចំណេះជំនាញ និងជជែកពិភាក្សាគ្នាទៅវិញទៅមកអំពីការងារបច្ចេកទេស ដើម្បីឱ្យការងារនេះទទួលជោគជ័យ។
សូមបញ្ជាក់ថា វគ្គបណ្តុះបណ្តាលមន្ត្រីព័ត៌មានវិទ្យាថ្មីថ្នាក់រាជធានី ខេត្តនេះរៀបចំឡើងរយៈពេលមាន៣ថ្ងៃ ចាប់ពីថ្ងៃទី២៨ ដល់៣០ ខែសីហា ឆ្នាំ២០១៨។ ហើយ មន្ត្រីព័ត៌មានវិទ្យាថ្មីថ្នាក់រាជធានី ខេត្តនឹងស្វែងយល់ពីប្រព័ន្ធទិន្នន័យតាមប្រព័ន្ធអនឡាញ (Online) របស់លេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដែលមានចំនួន១៥ ក្នុងនោះ រួមមាន៖
- ប្រព័ន្ធទិន្នន័យផែនការ និងថវិកាជាតិ (NAD)
- ប្រព័ន្ធទិន្នន័យគ្រប់គ្រងសារពើភណ្ឌ (NID)
- ប្រព័ន្ធទិន្នន័យគ្រប់គ្រងបណ្ណាល័យ (Lib)
- ប្រព័ន្ធផ្សព្វផ្សាយព័ត៌មានដេញថ្លៃគម្រោង (Bid) និងប្រព័ន្ធដេញថ្លៃគម្រោងក្រុង ស្រុក (DM Bidding)
- ប្រព័ន្ធទិន្នន័យនៃការអនុវត្តគម្រោង (PID)
- ប្រព័ន្ធតាមដាន និងវាយតម្លៃផ្ទៃក្នុងក្រុង ស្រុក ខណ្ឌ (DMK M&E Internal System)
- ប្រព័ន្ធត្រួតពិនិត្យ តាមដានការអនុវត្តសកម្មភាពគណនេយ្យភាពសង្គម (I-SAF M&E Database System)
- ប្រព័ន្ធទិន្នន័យមូលដ្ឋានឃុំ សង្កាត់ (CDB)
- ប្រព័ន្ធទិន្នន័យគម្រោងថ្នាក់ក្រោមជាតិ (Sub- National Project Database)
- ប្រព័ន្ធទិន្នន័យគ្រប់គ្រងលំដាប់ថ្នាក់ភូមិសាស្រ្ត និងលេខកូដ (gZ)
- ប្រព័ន្ធទិន្នន័យគ្រប់គ្រងក្រុមប្រឹក្សាឃុំ សង្កាត់ (CCD) ជាដើម។
ប្រព័ន្ធទិន្នន័យនេះជួយឱ្យការងារតាមដានត្រួតពិនិត្យ វាយតម្លៃ និងព័ត៌មាន និងការបូកសរុបរបាយការណ៍មានភាពទូលំទូលាយ និងងាយស្រួល ព្រមទាំងកាត់បន្ថយភាពស្មុគស្មាញក្នុងការចងចាំលេខកូដសកម្មភាពនានា។ សម្រាប់ប្រព័ន្ធទិន្នន័យ (Online) បម្រើជាសាធារណៈ សាធារណជនអាចចូលទៅកាន់អាស័យដ្ឋាន៖ db.ncdd.gov.kh និងប្រព័ន្ធទិន្នន័យ Online ប្រើប្រាស់សម្រាប់ផ្ទៃក្នុង៖ in.ncdd.gov.kh ៕