រាជធានីភ្នំពេញ៖ នៅរសៀលថ្ងៃព្រហស្បតិ៍ ១០កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៤ ខែឧសភា ឆ្នាំ២០១៨នេះ ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានអនុញ្ញាតឱ្យគណៈប្រតិភូស៊ុយអែតដឹកនាំដោយឯកឧត្តម Johaness Oljelund អគ្គនាយកផ្នែកកិច្ចសហការអភិវឌ្ឍន៍អន្តរជាតិនៃក្រសួងការបរទេសស៊ុយអែតចូលជួបពិភាក្សាការងារ នៅក្នុងទីស្តីការក្រសួងមហាផ្ទៃ។
នៅក្នុងជំនួបនេះ ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប និងឯកឧត្តម Johaness Oljelund អគ្គនាយកផ្នែកកិច្ចសហការអភិវឌ្ឍអន្តរជាតិនៃក្រសួងការបរទេសស៊ុយអែតបានពិភាក្សាការងារមួយចំនួនពាក់ព័ន្ធនឹងស្ថានភាពនយោបាយ សង្គម សេដ្ឋកិច្ច ស្ថានភាពនៃការអនុវត្តលទ្ធិប្រជាធិបតេយ្យ និងសិទ្ធិមនុស្សនៅកម្ពុជា។
ឯកឧត្តម សក់ សេដ្ឋា និងឯកឧត្តម Johaness Oljelund បានសម្តែងការពេញចិត្តចំពោះកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលស៊ុយអែត ជាពិសេសទាក់ទងនឹងការគាំទ្ររបស់ប្រទេសស៊ុយអែតក្នុងកំណែទម្រង់រដ្ឋបាលថ្នាក់ក្រោមជាតិក្នុងរយៈពេលកន្លងទៅនេះ។
ឯកឧត្តម សក់ សេដ្ឋា បានមានប្រសាសន៍ទៅកាន់ឯកឧត្តម Johaness Oljelund ថា នាពេលបច្ចុប្បន្ននេះ កម្ពុជានៅតែរក្សាបានសន្តិភាព ស្ថិរភាព សណ្តាប់ធ្នាប់សង្គមល្អ និងកំណើនសេដ្ឋកិច្ចល្អប្រសើរ។ យ៉ាងណា កម្ពុជានៅតែត្រូវការគាំទ្រពីស៊ុយអែត ដើម្បីបន្តអនុវត្តការងារកំណែទម្រង់វិមជ្ឈការ និងវិសហមជ្ឈការឱ្យកាន់តែប្រសើរថែមទៀត។
ឯកឧត្តមបានមានប្រសាសន៍ថ្លែងអំណរគុណដល់រដ្ឋាភិបាលស៊ុយអែតដែលបានជួយគាំទ្រដល់កំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជា។
សូមបញ្ជាក់ថា បច្ចុប្បន្ននេះ រដ្ឋាភិបាលស៊ុយអែតបាន និងកំពុងគាំទ្រដល់វិស័យចំនួន៤នៅកម្ពុជា ក្នុងនោះ រួមមាន លទ្ធិប្រជាធិបតេយ្យ សិទ្ធិមនុស្ស កំណែទម្រង់វិមជ្ឈការ និងវិសហមជ្ឈការ និងការបោសសម្អាតអាវុធយុទ្ធភណ្ឌមិនទាន់ផ្ទុះ។
