រាជធានីភ្នំពេញ៖ នៅថ្ងៃសុក្រ ៣កើត ខែបឋមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៥ ខែមិថុនា ឆ្នាំ២០១៨ ឯកឧត្តម សក់ សេដ្ឋា រដ្ឋលេខាធិការក្រសួង មហាផ្ទៃ និងជាប្រធានលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានអញ្ជើញដឹកនាំកិច្ចប្រជុំពិភាក្សាលើរបៀបវារៈមួយចំនួន ដើម្បីត្រៀមរៀបចំកិច្ចប្រជុំ គ.ជ.អ.ប លើកទី១៦ នាពេលខាងមុខ។
កិច្ចប្រជុំពិភាក្សានេះបានរៀបចំឡើងក្នុងសាលប្រជុំលេខាធិការដ្ឋាន គ.ជ.អ.ប ដោយសមាសភាពអញ្ជើញចូលរួមសរុបចំនួន ១៥រូបមកពីលេខាធិការដ្ឋាន គ.ជ.អ.ប និងក្រសួងមហាផ្ទៃ។
យោងតាមសេចក្តីព្រាងរបៀបវារៈ គ.ជ.អ.ប នឹងរៀបចំកិច្ចប្រជុំលើកទី១៦ នៅព្រឹកថ្ងៃសុក្រ ១០ កើត ខែបឋមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២២ ខែមិថុនា ឆ្នាំ២០១៨ ក្នុងសាលប្រជុំក្រសួងមហាផ្ទៃ៕
