កំពង់ឆ្នាំង ២៨ មករា ២០១៣៖ ប្រតិភូនៃអគ្គនាយកដ្ឋានរដ្ឋបាលមូលដ្ឋានក្រសួងមហាផ្ទៃ សហការជាមួយលេខាធិការដ្ឋាន គ.ជ.អ.ប បានចុះធ្វើការសិក្សាវាយតម្លៃអំពីស្ថានភាពការគ្រប់គ្រង និងដំណើរការទូទៅរបស់រដ្ឋបាលខេត្តកំពង់ឆ្នាំង រយៈពេល៤ថ្ងៃ ចាប់ពីថ្ងៃទី២១-២៤ខែមករា ឆ្នាំ២០១៣។
នេះគឺជាការសិក្សាវាយតម្លៃដែលមានលក្ខណៈស៊ីជម្រៅដោយផ្ដោតសំខាន់លើរចនាសម្ព័ន្ធគ្រប់គ្រង ប្រព័ន្ធគណនេយ្យភាព របៀបរបបការងារ ការអនុវត្តតួនាទីនិងភារកិច្ច ការគ្រប់គ្រងបុគ្គលិក ការគ្រប់គ្រងថវិកា ស្ថានភាពការិយាល័យធ្វើការងារ និងបរិក្ខារ ការគាំទ្របច្ចេកទេស និងការអនុវត្តសកម្មភាពផែនការអនុវត្តរយៈពេលបីឆ្នាំដំបូង ២០១១-២០១៣ (ផអ៣) នៃកម្មវិធីជាតិរយៈពេល១០ឆ្នាំ (២០១០-២០១៩) សម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។
គណៈប្រតិភូដែលចុះធ្វើការសិក្សាវាយតម្លៃនេះដឹកនាំដោយ ឯកឧត្ដម សួស ប្រាថ្នា អគ្គនាយករងនៃអគ្គនាយកដ្ឋានរដ្ឋបាលមូលដ្ឋានក្រសួងមហាផ្ទៃ សមាជិកក្រុមការងារនៃអគ្គនាយកដ្ឋានរដ្ឋបាលមូលដ្ឋាន និងមន្ត្រីលេខាធិការដ្ឋានគ.ជ.អ.ប បានជួបជាមួយក្រុមប្រឹក្សាខេត្ត កំពង់ឆ្នាំង គណៈអភិបាលខេត្ត គណៈកម្មាធិការសម្របសម្រួលបច្ចេកទេស គណៈកម្មាធិការពិគ្រោះយោបល់ស្ត្រីនិងកុមារ នាយករដ្ឋបាល និងទីចាត់ការទាំងប្រាំរបស់រដ្ឋបាលខេត្តកំពង់ឆ្នាំង និងជ្រើសរើសយកស្រុកមួយដើម្បីធ្វើការសម្ភាសន៍ទាក់ទងនឹងស្ថានភាពគ្រប់គ្រង និងការបំពេញតួនាទីភារកិច្ចរបស់រដ្ឋបាលស្រុកផងដែរ។
ឯកឧត្ដម សួស ប្រាថ្នា អគ្គនាយករងនៃអគ្គនាយកដ្ឋានរដ្ឋបាលមូលដ្ឋានក្រសួងមហាផ្ទៃបានថ្លែងនៅក្នុងពិធីជួបជាមួយរដ្ឋបាលខេត្ត និងស្រុកថា ការសិក្សាវាយតម្លៃនេះមានគោលបំណងដើម្បីពិនិត្យមើលឡើងវិញអំពីរចនាសម្ព័ន្ធគ្រប់គ្រងនិងរបៀបរបបធ្វើការងារនៅរដ្ឋបាលថ្នាក់ក្រោមជាតិដែលរចនាសម្ព័ន្ធគ្រប់គ្រងនិងរបៀបរបបធ្វើការងារថ្មីនេះ រាជរដ្ឋាភិបាលបានដាក់ឲ្យអនុវត្តចាប់តាំងពីក្រោយការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌឆ្នាំ២០០៩ កន្លងមក។
ឯកឧត្ដមបន្តថា៖ «ការសិក្សាវាយតម្លៃនេះដើម្បីស្វែងយល់ពីតម្រូវការ សំណូមពរផ្សេងៗរបស់រដ្ឋបាលខេត្ត ស្រុកដែលកំពុងអនុវត្តការងារប្រចាំថ្ងៃ ដើម្បីពិនិត្យមើលនិងរៀបចំលិខិតបទដ្ឋានគតិយុត្តិសម្រាប់អនុវត្តនិងឆ្លើយតបតម្រូវការជាក់ស្ដែងនៅពេលខាងមុខដែលថ្នាក់ជាតិនឹងធ្វើការផ្ទេរមុខងារក៏ដូចជាធនធាន ប្រគល់សិទ្ធិអំណាចជាបណ្ដើរដល់រដ្ឋបាលថ្នាក់ក្រោមជាតិអនុវត្តក្នុងនាមរាជរដ្ឋាភិបាល»។
បន្ទាប់មកប្រតិភូបានចុះសិក្សាវាយតម្លៃរដ្ឋបាលស្រុកកំពង់ត្រឡាច ដោយបានចុះជួបសម្ភាសន៍ក្រុមប្រឹក្សាស្រុក គណៈអភិបាលស្រុក គណៈកម្មាធិការសម្របសម្រួលបច្ចេកទេស គណៈកម្មាធិការពិគ្រោះយោបល់ស្ត្រីនិងកុមារ នាយករដ្ឋបាល ប្រធានការិយាល័យ និងមន្ត្រីការិយាល័យផែនការនិងគាំទ្រឃុំ សង្កាត់ ការិយាល័យរដ្ឋបាលនិងហិរញ្ញវត្ថុ និងការិយាល័យអន្តរវិស័យនៃស្រុកកំពង់ត្រឡាច ទាក់ទងនឹងការអនុវត្តតួនាទី ភារកិច្ចរបស់រដ្ឋបាលស្រុកនោះផងដែរ។
គួរបញ្ជាក់ថា ការសិក្សាវាយតម្លៃនេះនឹងធ្វើនៅគ្រប់រាជធានី ខេត្ត ក្រុង ស្រុក ខណ្ឌទាំងអស់នៅទូទាំងប្រទេសកម្ពុជា។ ក្រុង ស្រុក ខណ្ឌ ដែលនៅសល់និងត្រូវវាយតម្លៃដោយក្រុមការងារវាយតម្លៃរបស់សាលារាជធានី ខេត្តសាមីបន្ទាប់ពីក្រុមការងារសិក្សាវាយតម្លៃថ្នាក់ជាតិត្រូវបានបញ្ចប់៕